КъБР-м Тхылъхэр фIыуэ зылъагъухэм я зэгухьэныгъэм щызэхуэсащ абы хэтхэр, кърагъэблэгъащ РАН-м и Къэбэрдей-Балъкъэр щIэ­­­ныгъэ центрым информполитикэмкIэ и къудамэм и унафэщI, КъБР-м и Кинематографистхэм я зэгухьэныгъэм хэт, «Мечты сбываются» фондым и уна­фэщI Магомедовэ ФатIимэ.
Зэхуэсым хэтхэр теп­сэ­лъыхьащ Фатимэ «Город лысых» зыфIища, рассказитIу зэхэт тхыгъэм. Ар «Литературная Кабардино-Балкария» журналым къытехуащ. 
Зи рассказхэр цIыхухэм щIэ­щыгъуэ ящы­хъуа бзылъ­ху­гъэм итхащ усыгъэрэ про­зэрэ щызэхуэ­хьэса тхылъищ. Зэгухьэныгъэм хэтхэр зы­теп­сэлъыхьыну къы­хаха рассказитIыр зэма­ным пэджэжу, цIыхухэр куэд­рэ зрихьэлIэ Iуэхугъуэ­хэр къызэпкърахыу гъэпсащ. Аращ ахэр щIэ­зыджыкIахэм зи Iэдакъэ­щIэкI тхакIуэр къыщI­рагъэ­блэ­гъар.
Тхылъ­хэр фIы­­уэ зылъагъухэм я зэгухьэныгъэм хэтхэм Магомедовэм иратащ художественнэ тхыгъэм и гупсысэр зэры­хуэкIуам, усыгъэмрэ прозэм­рэ нэхъ пэ­гъунэгъум, и рассказхэм къыщиIэт Iуэхугъуэхэм я ­къе­жьапIэм, и художественнэ лIыхъужьхэм ярит шыфэ­лIыфэхэм, тхэну гукъыдэж къезыт Iуэхугъуэхэм яятеухуа упщIэхэр. Къызэхуэсахэм гъэщIэгъуэн ящыхъуащ ФатIимэ и нэIэ щIэт псапащIэ фондым и лэжьыгъэм, кином и техыкIэм, художественнэ тхыгъэм тхакIуэмрэ щIэджыкIакIуэмрэ зэрызэпищIэм теухуауэ жиIахэр. 
Тхыгъэри  сурэтри
ГЪУЭТ  Синэ  ейщ.