ЩоджэнцIыкIу Алий и цIэр зе­зыхьэ Къэбэрдей къэрал драмэ теат­рым щIышылэм и 30-м фэеплъ пшыхь щекIуэкIащ. Ар къызэ­рагъэпэщащ УФ-м гъуазджэхэмкIэ щIыхь зиIэ и лэжьакIуэ, КъБР-м и цIыхубэ артист,  КъБР-м и Къэрал саугъэтым и лауреат, адыгэ макъамэ гъуазджэм и лъабжьэр зыгъэ­тIылъахэм ящыщ, этномузыковед телъыджэ, уэрэджыIакIуэ цIэ­рыIуэ Бэрэгъун Владимир къыщалъхуа махуэм ирихьэлIэу.

Театрым и щIыхьэпIэм щагъэу­-ват артистым и гъащIэмрэ гуащIэмрэ теухуа гъэлъэгъуэныгъэ. Абы хагъэ­хьащ Бэрэгъуным и унагъуэм, ныбжьэгъухэмрэ лэжьэгъухэмрэ я гъу-сэу трахауэ щыта сурэтхэр, и лэ­жьыгъэхэм ятеухуа эскизхэр. 
Пшыхьыр ирагъэкIуэкIащ Що­джэнцIыкIу Алий и цIэр зезыхьэ ­Къэ­бэрдей къэрал драмэ театрым и артисткэ Тхьэщыгъуей Жаннэрэ Музыкэ театрым и уэрэджыIакIуэ, актёр Теунэ Джэмалрэ. Зэхыхьэр щы­щIидзэм экранымкIэ къагъэлъэ­гъуащ Бэрэгъун Владимир игъэзащIэу щыта уэрэдхэм ящыщ.
- Къэбэрдей-Балъкъэрым и лъэпкъ макъамэ щэнхабзэм, IуэрыIуатэм хэлъхьэныгъэ ин хуэзыщIахэм, а унэ­тIы­ныгъэхэм лъэужьыфI къыщызыгъэнахэм ящыщ зыщ Бэрэгъун Владимир. ЩIэныгъэ къэхутэныгъэ лэ­жьы­гъэхэр иригъэкIуэкIми, адыгэ ­Iуэ­рыIуатэр зи лъабжьэ пасэрей уэрэ­дыжьхэр игъэзащIэми, КъБР-м и Къэрал филармонием илъэс куэдкIэ и  унафэщI къулыкъум щыпэрытами, адыгэ макъамэ щэнхабзэм и хъугъуэ­фIыгъуэхэр хъумэнымрэ зегъэу­жьы­нымрэ хуэлэжьащ, - жиIащ КъБР-м щэнхабзэмкIэ и министр Къумахуэ Мухьэдин. - Кэнжэ къуажэм къыдэкIа щIалэр пасэу уэрэд жыIэным дихьэхат. Саратов къалэм Собинов Ле­-онид и цIэр зезыхьэ и консерваторэр 1969 гъэм къиуха нэужь, ар КъБР-м и Музыкэ театрым и уэрэджыIакIуэ ­хъуащ. Оперэ партие нэхъ гугъухэм ящыщу 19 игъэзэщIащ, классикэ, иджырей лэжьыгъэхэр къызэщIиу­быдэу. Апхуэдэу щIыналъэм и оперэ гъуазджэми хэлъхьэныгъэ хуищIащ. Абы къыдэкIуэу, Бэрэгъуным уэрэд, балладэ, романс щэ бжыгъэхэр итхащ. Ахэр радиомрэ телевиденэмкIэ къатырт, пластинкэхэм тету къы­дэкIырт. Нэхъыжьхэм ящIэж респуб­ликэ радиомкIэ къату щыта и уэрэдхэм яIа щIэупщIэр. Ар цIыху гу къабзэу, артист щэджащэу, щапхъэу щытащ. ЦIыхубэ артистым и фэеплъым вгъэпэжу фыкъызэрыкIуам пап­щIэ фIыщIэ фхузощI. 
Бэрэгъун Владимир яхэтащ дуней псом щагъэлъапIэ еджагъэшхуэ Гиппиус Евгений, КъардэнгъущI Зырамыку, нэгъуэщIхэми зэдатха «Народные песни и инструментальные наигрыши адыгов» («Адыгэ уэрэдхэмрэ пшыналъэхэмрэ») томищ хъу тхы­лъыр зыгъэхьэзырахэм. «Музыкаль­ный фольклор черкесов (адыгов)» тхы­лъыр, нотэ транскрипцэр щIыгъужу Владимир игъэхьэзырауэ щытар, езыр дунейм ехыжа нэужь къыдагъэкIащ. 
Филологие щIэныгъэхэмкIэ док-тор, КъБР-м щIэныгъэмкIэ щIыхь зиIэ и лэжьакIуэ, Гуманитар къэхутэныгъэхэмкIэ къэрал институтым адыгэ IуэрыIуатэмкIэ и къудамэм и щIэныгъэлI нэхъыщхьэ Гъут Iэдэм жиIащ Бэрэгъуным лъэпкъ макъамэ щэн­хабзэм хуищIа хэлъхьэныгъэр, цIы­хубэ уэрэдхэм хуиIа бгъэдыхьэкIэр, къапщ­тэмэ, цIыхубэ, профессио-наль­нэ гъэзэщIэкIэхэр зэхиухуэнэфу ­зэ­ры­щытар, и лъэпкъ лъагъуныгъэр къызэрылъытэгъуейр, абыхэмкIэ Вла­­димир хуэбгъадэ хъун зэры­щы­мыIэр. 
УФ-м гъуазджэхэмкIэ щIыхь зиIэ и лэжьакIуэ, КъБР-м и цIыхубэ артист, КъБР-м и Композиторхэм я зэгу­хьэныгъэм и правленэм и унафэщI, усакIуэ ХьэIупэ ДжэбрэIил тепсэ­лъы­хьащ пщIэшхуэ я зэхуаку дэлъу, зэныбжьэгъу пэжу Владимиррэ абы­рэ илъэс куэдкIэ зэрызэдэлэжьам, ноби зэрыщымыгъупщэм, Бэрэ­гъу­ным лъэпкъым хуищIар къалъытэу, и фэ­еплъ хуагъэувауэ илъагъуну зэ­ры­щIэ­хъуэпсыр. 
УФ-м и цIыхубэ артисткэ, КъБР-м гъуазджэхэмкIэ щIыхь зиIэ и ар­тист­кэ, КъБР-м и Къэрал саугъэтым и ­лауреат, ГъуазджэхэмкIэ Кавказ ­Ищхъэрэ къэрал институтым и кафедрэм и унафэщI, профессор Гъэсашэ Наталье тепсэлъыхьащ Бэ­рэ­гъун Владимир цIыху гуапэу ягу къызэринам, утыку щиткIи концерт ятыну гастроль щыкIуэкIи дэлъху пэлъытэу къызэрыхущытам, куэдрэ зэрызэдэлэжьам.
Наталье и гукъэкIыжхэм къыпищащ Владимир и лэжьэгъуу щы­- та, КъБР-м щIыхь зиIэ и артисткэ, КъШР-м и цIыхубэ артисткэ, Щэнхабзэмрэ гъуазджэхэмкIэ колледжым щезыгъаджэ Таукеновэ Галинэ. Абыи жиIащ Бэрэгъуныр цIыхуфIу, артист Iэзэу зэрыщытар, нэжэгужэу утыку зэритар, макъамэ щэнхабзэм хэлъ­хьэныгъэфI зэрыхуищIар, и макъ дахэр ягу къызэринар. 
Кэнжэ къуажэ администрацэм и ­Iэтащхьэ Степан Эдуард и псалъэм къыхигъэщащ щэнхабзэмрэ гъуазджэмрэ я зыужьыныгъэр зыгъэбея, цIыхубэм фIыкIэ ягу къина Бэрэгъун Владимир и гъащIэмрэ гуащIэмрэ зэрыригушхуэр. 
Бэрэгъун Владимир и шыпхъу нэхъыжьым ипхъу Махуэ Равидэ и гугъу ищIащ и анэмрэ абырэ яку дэлъа зэхущытыкIэ дахэм икIи фIыщIэ яхуи­щIащ пшыхьым зыкърезыгъэ­хьэ­лIахэмрэ ар къызэзыгъэпэщахэм- рэ.
Пшыхьым щагъэлъэгъуащ Вэро­къуэ Владимир 1985 гъэм триха, Бэ­рэгъун Владимир ХьэтиякIуэм и ролыр щигъэзэщIа «Свадьба на Тереке» фильмым щыщ пычыгъуэ. Зэ­хыхьэр ягъэдэхащ Музыкэ театрым и хорым и уэрэджыIакIуэхэм, Гъуазд­жэ­хэмкIэ Кавказ Ищхъэрэ институтым Щэнхабзэмрэ гъуазджэхэмкIэ и колледжым и уэрэджыIакIуэхэм (художественнэ унафэщIыр КъБР-м щIыхь зиIэ и артисткэ Къашыргъэ ­Мадинэщ), «Терчанка», «Нартхасэ», «Нал цIыкIу» цIыхубэ къэфакIуэ ансамблхэм.

ТЕКIУЖЬ Заретэ.
Сурэтхэр  Къарей  Элинэ  трихащ.