Аманлыкъчыланы терсликлерине жолукъдуруу жаны бла федерал службаны КъМР-де Управлениясыны кенгертилген коллегиясында 2025 жылда оператив-къуллукъ, ырысхы-мюлк эм финанс-экономика ишни эсеплери белгили этилгендиле.
Кенгешге федерал инспектор Дмитрий Васильченко, Экономика эм жамауат къоркъуусузлукъ советни секретары Казбек Татуев, ич ишле министр Вячеслав Крючков, КъМР-де Адамны эркинликлери жаны бла уполномоченный Зумакъулланы Борис, республиканы прокуроруну биринчи орунбасары Дмитрий Гаврилов, КъМР-де Сабийлени ишлери жаны бла уполномоченный Амина Бадракова, Жамауат тинтиу комиссияны башчысы Анатолий Барсагов къатышхандыла, деп билдиргендиле бизге ведомствону пресс-службасындан.
Эсепле бла жыйылгъанланы управленияны таматасы Александр Демидов шагъырей этгенди. Ол, биринчиден, тутулгъанланы жашау болумлары игиленнгенлерине эс бургъанды. Былтыр учреждениялада тынгылы жумушла бардырылгъандыла.
– Ол санда колониялада, колония-поселенияда медицина, санитар отоула тапландырылгъандыла, мекямланы башлары алышыннганды, саулукъларына кёре чекленнген онглары болгъанла учреждениягъа чырмаусуз кирирча мадарла этилгендиле, - дегенди ол.
«РФ-де пробацияны юсюнден» федерал законну жашауда бардырыуну, тюзетиу учреждениялагъа келтирирге эркин этилмеген затланы тыйыуну, тутулуп тургъанланы къайтарып аманлыкълагъа къатышыудан сакълауну, экстремизмни бла терроризмни ниетлерин жайыугъа къажау ишни юслеринден да баргъанды сёз. Ведомствону башчысы медицина болушлукъ бериу къалай къуралгъанын, производствону кенгертиуню, жамауат эм право сакълаучу организацияла, тёрели динлени келечилери бла байламлыкъланы да билдиргенди.
Докладны сюзе, Казбек Татуев УФСИН регионда оператив болумну ышаннгылылыгъын жалчытыугъа этген къошумчулукъну белгилегенди эмда ведомство аманлыкъланы азайтыугъа бурулгъан мадарланы мындан ары да жетишимли толтурлугъуна ышаннганын айтханды. Болумну тапландырыугъа уа тутулуп тургъанла эркин болгъандан сора ишге тохташханлары, жамауат жашаугъа къайтханлары себеплик этгенин чертгенди ол.
Ведомствону ишине Зумакъулланы Борис да иги багъа бергенди. Уполномоченный бла этилген келишимни чеклеринде тутулуп тургъанланы эркинликлери бла праволары сакъланадыла, тюзетиу учреждениялада приёмла бардырыу а хайырлылыгъын кёргюзтгенди.
Дмитрий Гаврилов жууапха эркинликлери сыйырылмай тартылгъанланы арасында къайтарып этилген аманлыкъланы саны 40 процентге азайгъанын иги шартха санагъанды. Аны бла бирге учрежденияланы кеслеринде этилген аманлыкъла да азайгъандыла.
Ызы бла къууанчлы иш болгъанды. Кёп жылланы ичинде хайырлы байламлыкъла жюрютгенлери ючюн ОНК-ны башчысы Анатолий Барсагов эм Жамауат тинтиу комисияны секретары Созайланы Алка УФСИН-ни башчысыны Ыразылыгъы бла саугъаланнгандыла.
Александр Демидов борчларын жетишимли толтургъан инспекторланы Гавриил Державин атлы майдал, РФ-ни ФСИН-ини Сыйлы грамотасы эмда федерал службаны башчысыны Ыразылыгъы бла да саугъалагъанды.
Коллегияны ахырында ведомствону быйылгъа борчлары бла муратлары белгиленнгендиле.
Тикаланы Фатима
хазырлагъанды.
