Адамны эм зауукълу, жарсыусуз заманы аны студент жылларыдыла дегенлик керти болур. Бусагъатдагъы студентле да керти да зауукълу жашау бардырадыла. Алагъа не жаны бла да билимлерин, онгларын айнытыр ючюн, кёп амалла къуралгъандыла. Адамны ич дуниясын ачыкълар, айнытыр ючюн да окъургъа сюйген жаш адамлагъа онгла кёпдюле.
Тырныауузда регион колледжни студентлери, билим алыудан сора да, бош заманларын магъаналы къурап, хайырлы ётдюредиле. Россейни студентлерини кюнюне атап ала «КВН» оюнда эки къауум болуп тюбешгендиле. Колледжни таматасы Этезланы Екатерина да окъуучуларын байрам бла алгъышлагъанды.
Ол а керти да уллу байрам эди. Келген къонакъла, районну къуллукъчулары, Элбрус муниципал районну администрациясыны башчысы Отарланы Мухтар, жыйылгъанланы алгъышлай, районнга жангы кадрланы магъаналары уллу болгъанын, алагъа бек ышаннганларын да билдиргендиле. «Тамблагъы кюнюбюз жаланда сизге, сизни жетишимлеригизге таяннганын унутмагъыз. Хар биригиз да сайлагъан усталыгъыгъызда алчы болургъа итинигиз!» - дегенди Мухтар Магомедович.
Районну билим бериу управлениясыны таматасы Атаккуланы Нюржан а быллай байрамлагъа бла тюбешиулеге сюйюп, ёхтемленип келгенин айтханды. Нек дегенде, ол алада жаш тёлюге салыннган уллу къыйынны магъаналы эм ахшы къыйматын кёреди. «Бизни районубузну аламат жаш тёлюсю барды. Мен анга бек къууанама. Адетлерибизни бла тёрелерибизни эсде тутханла, къартланы сыйлай билгенле, тиширыуну хурметин кёргенле! Мындан ары да бу халыгъыз жаланда иги жанына тюрлене, бизни андан да бегирек къууандыра барырыгъызны тежейме!» - дегенди ол.
Билим бериу управленияны жаш тёлю политика жаны бла бёлюмюню таматасы Атмырзаланы Алиса, «Сабийликни навигаторлары» къымылдауну координатору Будайланы Лиза да районну студентлерин алгъышлап, ала бла ёхтемленнгенлерин айтхандыла.
Оюннга багъа бичген жюри Элбрус районну администрациясыны башчысыны биринчи орунбасары Толгъурланы Расул, Будайланы Лиза, «Эльбрусские новости» район газетни баш редактору Газаланы Зухура, Жаш тёлю араны таматасы Этезланы Аслан ойнагъан къауумлагъа тюз эсепле чыгъарыргъа кюрешгенди.
Ахырында уа шуёхлукъ хорлагъаны барысын да ыразы этгенди. Къайсы байрамны да жарытхан музыкалы номерле ол кюн да къонакъланы эм къараучуланы кёллерине жетгендиле. Байрам къууанчлы халда бошалгъанды. Зауукълу тюбешиу а аланы эслеринде кёпге дери къаллыгъы уа хакъды.
Темуккуланы Асият.
