Красноярск къалэм къикIыу хъыбар ­гуапэ къытIэрыхьащ: бэнэкIэ хуитымкIэ Ярыгин Иван и Кубокыр къэхьыным хуэу­нэтIауэ абы щекIуэкIа дунейпсо зэ­хьэ­зэхуэм къыщыхэжаныкIащ икIи япэм къэмыхъуауэ зы хьэлъагъ зиIэ гупым я деж (килограмм 74-рэ) Къэбэрдей-Балъкъэрым и бэнакIуэхэм - БищIо Тимур, ЗэкIуий Анзор, Шэрий Иналбэч сымэ - япэ увыпIищыр щаубыдащ. КъБР-м и Iэтащ­хьэ КIуэкIуэ Казбек абыхэм гуапэу ехъуэ­хъуащ.

ЗэIущIэм зэрыщIидзэу ди щIалэхэм ­къапэщIэта я хьэрхуэрэгъухэр ирагъэ­кIуэ­тэкIыурэ финалым и Iыхьэ ныкъуэм щы­зэхуэзэжахэщ. Зы лъэныкъуэмкIэ щызэ­пэ­щIэтащ БищIо Тимуррэ Шэрий Иналбэчрэ, адреймкIэ - Олимп джэгухэм я чемпион, ­дунейпсо чемпионатыр щэнейрэ къэзыхьа, ­бэнакIуэ цIэрыIуэ Сидаков Заурбэчрэ Зэ­кIуий Анзоррэ.
КъызэгъэпэщакIуэхэми, тренерхэми, уеблэмэ езы спортсменхэми мы гупым япэ увыпIэр зратыр осетин щIалэрат, икIи, а псом и щыхьэт хъууэ, Сидаковыр лъэщу ЗакIуийм къебгъэрыкIуащ, зэIущIэм хухаха зэманыр икIэм нэсыным секундэ 30 фIэкIа къэмынэжыху. Абы щыгъуэ зэIущIэм и бжыгъэр 5:0-у осетин щIалэр текIуэрт. 
Ауэ, иужькIэ, Анзор зыкъызэкъуихыжащ, Сидаковым и гугъэр къызэтрикъутэу, икIи а къэнэжа зэман мащIэм къриубыдэу зэкIэ­лъхьэужьу очкоуэ 8 къихьащ. Апхуэдэ щIы­кIэ­кIи, финалым хуэзышэ и гъуэгум Олимп джэгухэм я чемпионыр тригъэкIуэтащ. КIэух зэхьэзэхуэм ЗэкIуийм къыщыпэплъэнут адрей ди щIалитIым языхэзыр. 
БищIомрэ Шэриймрэ я зэIущIэр гуащIэу екIуэкIащ икIи абы хухаха зэманыр 1:1-уэ ­иухащ, ауэ текIуэныгъэр Тимур иратащ, иу­жьу очко къызэрихьам папщIэ.
Финалым щызэхуэзащ БищIомрэ За­кIуиймрэ. Мыбдежми, ди щIалитIыр зэхуэдэу текIуэныгъэм щIэбэнащ, ауэ Тимур нэхъ лъэ­щу къыщIэкIащ икIи зэхьэзэхуэм и ­бжыгъэр 2:0-у къихьащ. Хэт ищIэрэ, Сида­ковым тригъэкIуэда и къарур финалым щы­хуримыкъужагъэнкIи хэлъщ ЗэкIуийм. 
КъищынэмыщIауэ, дауэ хъуми, Ярыгин Иван и Кубокым япэм къэмыхуауэ зы лъагапIэм адыгэ щIалищ зэгъусэу теуващ. 
Къыхэдгъэщынщи, Ярыгин Иван и Кубокыр къэхьыным хуэунэтIа зэхьэзэхуэр бэ­нэкIэ хуитымкIэ дуней псом щынэхъ лъапIэ, пщIэ лъагэ зиIэ зэпеуэхэм ящыщщ. Спортсменхэм я дежкIэ абы ущытекIуэныр - ехъулIэныгъэшхуэщ. ЖыпIэну урикъунщ, къэрал 21-м я бэнакIуэ лъэщу 496-рэ мыгъэрей зэIущIэм зэрыхэтар. 
Абы нэмыщI, а зэхьэзэхуэм иджыри ­«дунейпсом и чемпионат цIыкIукIэ» йоджэ. Уеблэмэ, спортсменхэмрэ тренерхэмрэ къы­зэралъытэмкIэ, Ярыгин Иван и Кубокым ущытекIуэну куэдкIэ нэхъ гугъущ, Европэмрэ Азиемрэ я чемпионатхэр къэпхьыным ­нэхърэ. Абы нэмыщI, зэрыхабзэу, япэ увы­пIэр къэзыхьахэр УФ-м и командэ къыхэ­хам хэту Европэм и чемпионатым ягъакIуэ.
Дохъуэхъу, ди щIалэ ахъырзэманхэм, я текIуэныгъэ дахэхэмкIэ куэдрэ дагъэгуфIэну, спортым и лъагапIэ нэхъ иныжхэр къащ­тэну, Къэбэрдей-Балъкъэрымрэ Урысей Федерацэмрэ я щIыхьыр лъагэу яIэтыну. 

ХЬЭЩЫКЪУЕЙ  Олег.