КъМР-ни Башчысы Казбек Коков Правительствону юйюнде Къабарты-Малкъарны халкъ художниги Мухадин Кишев, аны юй бийчеси - искусствовед Жаклин Диана Мосс бла тюбешгенди. Республиканы оноучусу Мухадин Кишев Къабарты-Малкъарны суратлау искусствосун айнытыугъа уллу къыйын салгъанын белгилегенди, аны жете тургъан 80-жыллыгъы бла алгъышлагъанды, КъМР-ни Сыйлы грамотасын бергенди.
-Сизни чыгъармачылыкъ ишигиз кёп тюрлюдю, аны чеги жокъду. Алай сизни анга кёллендирген баш кюч а мында, гитче Ата журтугъузда, болгъанын биз уста билебиз. Сиз бизге бек багъалысыз, сизни бла да дайым ёхтемленебиз, Къабарты-Малкъарда кёргенибиз бизге уллу къууанчды,-дегенди КъМР-ни Башчысы.
Казбек Коков фахмулу суратчыгъа алгъыш этгенди, саулукъ, ырахатлыкъ эмда чыгъармачылыкъ ишинде жангы жетишимле тежегенди.
Тюбешиуню кезиуюнде Къабарты-Малкъарда маданиятны бла искусствону айнытыуну, алагъа жамауат, артыкъда жаш тёлю, табынырча этиуню амаллары сюзюлгендиле. КъМР-ни халкъ художниги кесини чыгъармачы проектлерини, ол санда энчи кёрмючле къурар планлары болгъанларыны, юсюнден билдиргенди.
Ушакъгъа КъМР-ни культура министрини къуллугъун толтургъан Мухадин Кумахов, Россейни Художниклерини союзуну регион бёлюмюню таматасы Геннадий Темирканов да къатышхандыла.