МЧС-ни КъМР-де Баш управлениясы озгъан жылда тамамлагъан ишлерини эсеплерин чыгъаргъанды. Республиканы асламлы информация органларыны келечилери бла ведомствону башчысыны къуллугъун болжаллы халда толтургъан Эльдар Хашхожев тюбешгенди.
- Бек алгъа битеу барыгъызгъа да ыспас этерге сюеме Управленияны ишин тынгылы ачыкълагъаныгъыз ючюн, - деп чертгенди Эльдар Русланович пресс-конференция башланырны аллында.
Ызы бла ол былтыр регионда 5 къыйын эмда 4 социал магъаналы болумла тохташдырылгъанларын билдиргенди. Белгилегенича, Управление жамауатны къоркъуусузлугъун жалчытыуда профилактикагъа артыкъда уллу эс бургъанды. Ол жаны бла 400 чакълы бир жумуш тамамланнганды. Оператив хазырланыу жаны бла 520 юйрениу бардырылгъанды.
Жай кезиуде Гирхожан суу бла байламлы болгъан къыйын кезиуню эсге тюшюре, Эльдар Хашхожев ведомство алгъаракъдан да сууну баш жанында къутхарыучуланы постун орнатып, аланы билдириулерин тийишлисича хайырланып, аланы адамлагъа жетдирип, сакъ болургъа чакъыргъандыла.
Ырхы баргъан дамбаны юсюнден соруугъа жууап бере, докладчы бюгюнлюкде Управление ол ишлеге къатышыргъа эркин болмагъанын билдиргенди.
- Алайда жангы дамба ишленирикмиди огъесе болгъаннымы тап халгъа келтирликдиле, билмейбиз. Ол затлагъа башха ведомствола бла органла оноу этедиле, - дегенди Эльдар Русланович.
Андан сора ол Нальчикде бла Азау талада канаткала юзюлгенлери бла байламлы жарсыулу шартланы юслеринден айтханды. Билдиргенича, 23 эм 35 адамны къутхарыу жаны бла ишни аланы специалистлери жетишимли бардыргъан эдиле.
2025 жылда от тюшюу бла байламлы халны юсюнден билдире, докладчы от ёчюлтюучюле чакъырыулагъа 2 минг 163 кере баргъанларын айтханды. Алада 200 адамны къутхаргъандыла, 1 миллиард сом багъасы ырысхы сакъланнганды. Жарсыугъа, ёлгенле да болгъандыла - тогъузоулан. От тюшюулени 2 минги къургъакъ кырдыкны кюйдюрюу бла байламлы эди.
Надзорлукъ къалай къуралгъанын билдире, МЧС-ни къуллукъчусу республикада тинтиуле бардырыллыкъ объектлени саны 11 мингнге жетгенин эсгертгенди. Тинтиуле жорукълагъа бузукълукъ этиу жаны бла 300-ден аслам кемчиликни ачыкълагъандыла. Белгиленнген профилактика ишле толусунлай ётдюрюлгендиле. Аланы хайырындан от тюшюулени саны, ал жылла бла тенглешдиргенде, былтыр 25 процентге азайгъанды. Мюлк жаны бла жангыртыуланы юсюнден айтханда, кёп къатлы юйле от тюшгенни ёчюлтюуде хайырланырча техника бачхычла бла жалчытылгъандыла.
Жай кезиуде адамлагъа жууунургъа республиканы тийресинде 10 кёл бёлюннген эди. Жарсыугъа, жорукъланы бла тыйгъычланы сансыз этип суулагъа киргенле болгъандыла. Аладан жетеулен ёлгендиле.
Таулагъа тебиреген турист къауумланы юслеринден айта, Эльдар Хашхожев быйыл МЧС-де эсепден 10 минг адам ётгенин билдиргенди. 2024 жыл бла тенглешдиргенде, ол 2 кереге азды, деп чертгенди. МЧС-ни КъМР-де Баш управлениясыны пресс-секретары Кантемир Беров ангылатханнга кёре, бу шарт, баям, регистрацияны ётюу бир кесек къыйыныракъ болгъаны бла байламлыды, адамла эриннген этедиле.
Элбрус излеу-къутхарыу къауумну ишинде энчи тохтай, докладчы озгъан жыл аланы болушлукълары 127 кере керек болгъанын билдиргенди. Къутхарыу ишлени кезиулеринде ала 159 адамны жанларын сакълагъандыла. Ёлгенлени саны уа 18-ге жетгенди. Жарсыугъа, бирле хауа болумлагъа эс бурмай, кеслери алларына таугъа тебирерге ёчдюле. Аллай кезиуледе уа жангыз адамгъа тик жоллада хата да тюшеди. Биргесине адам болмаса, къайры баргъанын да билдирмесе, излеу ишле асыры кеч башланадыла.
Чегетде алгъын лыжачыла, сноубордчула да къыйын болумлагъа терк-терк тюшюучю эдиле. Быйыл къар кечирек жаугъаны бла байламлы, аллай жарсыулу ишле болмагъанлары къууандырады.
Тюбешиуню ахырында Эльдар Хашхожев «РФ-ни МЧС-и» приложенияны телефонлада орнатыуну хайырлылыгъыны бла магъаналылыгъыны юсюнден айтханды.
Таппасханланы Аминат
