Россейни Следствие комитети къуралгъанлы 15 жыл толгъанына жораланып, аны КъМР-де управлениясында къууанчлы жыйылыу болгъанды. Анга ведомствону ветеранлары эмда Следствие комитетни кадет классыны курсантлары, конкурслада хорлагъан жаш адамла да чакъырылгъандыла.
Тюбешиуню ача, управленияны башчысы юстицияны полковниги Андрей Фишман 15 жыл тамамланнган жумушланы эсеплерин чыгъарыргъа, жангы муратла салыргъа тийишли заман болгъанын чертгенди. Бу жылланы ичинде Россейни СК-сы бирикген, хайырлы ишлеген, инсанланы эркинликлерин сакълагъан кючлю орган болгъанын чертгенди ол.
- Бу жылла органны къурауну, законнга къуллукъ этиуню, биригип, борчларыбызны толтурууну заманы болгъандыла. Къабарты-Малкъарда управленияны коллективи салыннган борчланы бет жарыкълы толтурады. Уллу эм артыкъда уллу, жамауат къоркъуусузлукъгъа инсанларыбызны тынчлыкъларына заран салгъан аманлыкъланы тинтиуге энчи эс бурулады,-дегенди.
Ол белгили этген тарихлеге кёре, бу жылланы ичинде следствие управленияны къуллукъчулары 12 минг уголовный ишни тинтгендиле, сюдню къараууна 6,5 мингден аслам иш берилгенди. Аладан 2,5 минги уллу эм артыкъда уллу аманлыкъладыла.
Коррупциягъа къажау ишге баш магъана бериледи. Право низамны сакълаучула тамамлагъан тинтиуледен сора энчи даражалары, къуллукълада ишлеген 50 адам жууапха тартылгъанды. Этилген къоранчланы 2 миллиард сому къайтарылгъанды.
- Биз тарихле ючюн ишлемейбиз, баш борчубуз социал тенгликни сакълауду, республиканы ышаннгылылыгъын жалчытыуду,-дегенди Андрей Фишман сёзюню ахырында эмда байрам бла энтта бир кере алгъышлап, коллективге саулукъ, Россейге эм законлукъгъа къуллукъ этиуде жетишимле тежегенди.
Жыйылыуда къууанчлы иш да болгъанды. Къуллукъ этиуде жетишимлери ючюн управленияны келечилери ведомствону башчысыны эм управленияны таматасыны саугъаларына тийишли кёрюлгендиле. Ветеранлагъа, кадетлеге эм ведомстволу конкурслада хорлагъан жаш адамлагъа уа майдалла, грамотала берилгендиле.
Тикаланы Фатима
хазырлагъанды.
