Иджыблагъэ Iуащхьэмахуэ лъапэ щекIуэкIащ КъБР-м и еджапIэ нэхъыщхьэхэмрэ колледжхэмрэ щIэсхэм я зэIущIэ. Зи зэфIэкIхэмкIэ, жыджэрагъкIэ, IуэхущIафэкIэ адрейхэм къахэщхьэхукI, гъуазэ хъуну хэлъэт зиIэхэр гъуэгу захуэ тегъэувэным, ахэр щIалэгъуалэм пашэу хэту егъэсэным хуэунэтIа Iуэхур къызэригъэпэщащ «Пэрытхэм я зэщIэхъееныгъэм».
«Пэрытхэм я зэщIэхъееныгъэ» зэгухьэныгъэм и щIыналъэ къудамэм и дауэдапщэхэр къызэзыгъэпэщ Чочаевэ Ма-рьям къыхилъхьа «Пэрытхэр 2.0» Iуэхум щыщщ мы зэIущIэр.
- Зи гугъу тщIы лэжьыгъэр Урысейм и щIалэгъуалэ къэрал IуэхущIапIэм и мылъкукIэ дубзыхуащ. «Пэрытхэм я зэщIэхъееныгъэм» сыхыхьа къудейуэ си пщэ къыдалъхьауэ щытащ зы Iуэхушхуэ, «Пэрытхэр» зыфIэтщар. Ар курыт еджапIэм щIэсхэм хуэщIат, егъэджэныгъэми епхат. КъыкIэлъыкIуэ илъэсым абы къетшэлIащ еджакIуэхэри студентхэри. Мис абы щыгъуэ нэрылъагъу тщыхъуащ ди щIыналъэм и студентхэм гулъытэ зэрамыгъуэтыр, абыхэм нэхъыбэу ядэлэжьэн зэрыхуейр, - жиIащ Чочаевэм.
ЗэIущIэм хэта студентхэр «Пэрытхэм я зэщIэхъееныгъэм» хагъэхьам и закъуэ мыхъуу, дэтхэнэми зэIущIэм зыкъыщигъэлъэгъуэну Iэмал иIащ: абыхэм ягъэхьэзыращ утыку зэрихьэ, гупым зэрызрагъэцIыху видеотеплъэгъуэхэр.
Иджыри зы щIэщыгъуэ хагъэхьащ Iуэ-хум. Нэхъапэм къызэгъэпэщакIуэхэр зэщIэхъееныгъэм щыщхэрауэ щытамэ, иджы Iуэхум ирагъэблэгъащ КъБКъУ-м и вожатэхэри. Ахэр гупхэм я унафэщIу щытащ, зыгъэпсэхугъуэм деж щIалэгъуалэм я нэгу зэрызрагъэужь Iэмалхэр я пщэ дэлъащ.
ЗэIущIэм щагъэлъэгъуащ абы хэта цIыху 80-м я проектхэр. Гулъытэ нэхъ зыхуащIахэм, къыхагъэщхьэхукIахэм ящыщщ сабий зеиншэхэм я IэдакъэщIэкIхэр щащэ жармыкIэ Абхъазым и утым деж къызэгъэпэщыныр. Ар къыхэзылъхьар медицинэмкIэ колледжым и 2-нэ курсым щIэс Балэ Темболэтщ. ЩIалэм зэрыжиIамкIэ, ар езым и закъуэ иубзыхуа лэжьыгъэкъым, атIэ цIыху 15-м я акъылзэхэдзэщ.
- Зи гугъу сщIы жармыкIэр Нартан къуажэм дэт школ-интернат №5-м щIэсхэм папщIэ едгъэкIуэкIыну дыхуейщ. Ар ди закъуэкIэ зэфIэха зэрымыхъунур къыдгуроIуэри, Iуэхум къыхэтшэну дыхуейт «Пэрытхэм я зэщIэхъееныгъэм» и щIыналъэ къудамэри, КъБР-м ЩIалэгъуалэм я IуэхухэмкIэ министерствэри, хьэрычэтыщIэхэ-ри. Сабийхэм езым ягъэлъэгъуэнущ икIи ящэнущ я IэдакъэщIэкIхэр, сату щIэным и хабзэхэм зыщагъэгъуазэу, цIыхухэм ядэуэршэру, цIыхубэм зэращыщыр зыхащIэу, - жиIащ Балэм.
- Догугъэ мы Iуэхум студентхэри къыхэтшэну. Къыхэгъэщыпхъэщ: гулъытэ нэхъы-бэ зыхуэтщIар къуажэ пхыдзахэм къикIа щIалэгъуалэрщ. ЩIэныгъэмрэ техникэмрэ зыщаужь, гъащIэм IэмалыфIхэр къыщыдит зэманщ дыщыпсэур. Ар къэдгъэсэбэпу ди щIалэгъуалэм я гур утIыпщауэ, тегушхуауэ утыку итыным, IуэхуфIхэм зрапщытыным хуэдгъэсэнырщ дызытелажьэри, зэдгъэхъулIэну яужь дитщ, - игъэбелджылащ Марьям.
Фырэ Анфисэ.
