КъБР-м ЦIыхубэ IэпщIэлъап­щIагъэмрэ IэпэIэсагъэмкIэ и цент­рым декоративно-прикладной ­гъуазджэм щыщ лэжьыгъэхэр ­щагъэлъагъуэ, «Ремесел древних новизна» грант Iуэхум хыхьэу. Ар къызэрагъэпэщащ ­гъащIэр узыншэу ехьэкIыным ­телажьэ «Анна» валеологие клубым и щIыналъэ къудамэм хэт­­­хэм, КъБР-м Лъэпкъ Iуэхухэм-рэ жылагъуэ проектхэмкIэ и министерствэм и субсидие къэхьы­нымкIэ республикэ зэпеуэм зэры­щытекIуам и фIыгъэкIэ. Ар и жэрдэмщ клубым и унафэщI Жиздюк Маринэ.

IэпщIэлъапщIэ, егъэджакIуэ Мы­сачэ Верэ и унафэм щIэт Iэ­пэ­Iэсэхэм утыку кърахьащ лэжьыгъэ гъэщIэгъуэнхэр. Гъэлъэгъуэныгъэм лэжьыгъэ 70-м нэблагъэ къызэ­щIеубыдэр. Абы щыболъагъу гуа­щэхэр, удз гъэгъахэр, гъащIэм узы­щрихьэлIэ теплъэгъуэхэр. Выставкэм зрезыгъэхьэлIахэм лэжьыгъэ­хэр ягу дыхьащ. ЖыпIэнурамэ, Iуэху­щIапIэм и пэшыр ИлъэсыщIэ таурыхъым хуэдэт, абы щагъэува сурэтхэмрэ хьэпшыпхэмрэ телъы­джэти. 
Iуэхур къыхалъхьащ ди нэхъыжь IэпщIэлъапщIэхэм я зэфIэкIыр къы­зэ­къуахын, дэзыхьэх лэжьыгъэм ­нэхъри трагъэгушхуэн, я щыIэкIэ-псэукIэр ирагъэфIэкIуэн папщIэ. 
Гъэлъэгъуэныгъэр къызэIуихащ КъБР-м и Парламентым щэнхабзэмкIэ, граждан жылагъуэм зегъэу­жьынымрэ хъыбарегъащIэ Iуэху­хэмкIэ и комитетым и унафэщI ­Те­куев Амурбий. Абы жиIащ респуб­ликэм щыпсэу, зэфIэкI зиIэ нэ­хъыжьыфIхэм я лэжьыгъэ щIэщыгъуэхэм япэу зэрызыхигъэгъуэзар, РАХ-м и президент Церетели Ва­силий ди щIыналъэм къыщыкIуам ХудожествэхэмкIэ академием и ­къудамэ ди щIыпIэм къыщызэIу­-хын зэрыхуейм и гугъу зэращIар, республикэм ис щIалэгъуалэм Iэ­пэ­IэсагъэмкIэ щIэныгъэ зрагъэгъуэ­тыну Iэмал яIэн папщIэ. Текуев Амурбий гъэлъэгъуэныгъэм хэт IэпщIэлъапщIэхэм фIыщIэ яхуи­щIащ, пасэрей цIыхубэ IэщIагъэ ­дахэр зэрахъумэмрэ я Iэдакъэ­щIэкIхэр зэрыкупщIафIэмрэ пап­щIэ. 
Выставкэм зыкърагъэхьэлIащ ­КъБР-м лъэпкъ Iуэхухэмрэ жыла­гъуэ проектхэмкIэ и министерствэм и къудамэм и унафэщI Куэцэ Эльбердрэ а къудамэм и IэщIагъэлI ­нэхъыщхьэ Шевченкэ Аллэрэ. Абы­хэм я псалъэм къыхагъэщащ зи лIыкIуэ министерствэм Iуэху гъэ­щIэгъуэн куэд цIыхухэм зэрадиIыгъыр, псэгъэгуфIэ-дахагъэ зыхэлъ мы зэхыхьэри абыхэм зэращыщыр. Зэхуэсахэм абыхэм ягу къагъэкIыжащ къэралым ис нэхъыжьхэм я ­гъащIэр нэхъ кIыхь ящIыным, ядэ­Iэпыкъуным телэжьэну УФ-м и Президентым и унафэмкIэ пщэрылъ къызэрыщищIыр. Выставкэр зи жэрдэмым, ар къызэзыгъэпэщахэмрэ абы хэтахэмрэ фIыщIэ хуа­щIащ, я ехъулIэныгъэхэм зэрыригушхуэри дыщIагъужащ. 
Мысачэ Верэ къытеувыIащ гъэ­лъэгъуэныгъэм хагъэхьа хьэп­шып­хэм ящыщ куэд къызыхащIыкIа ­нартыху бзийр тхылъымпIэмрэ щэкIымрэ хуэдэу зэрыгъущэм икIи ар мащIэу «зэрыткIийм», псы тIэкIу лъэбгъэIэсмэ, «жыIэдаIуэ» зэры­хъум. Пасэм абы кIапсэхэр, матэ­-хэр, арджэнхэр, сабий вакъэхэр къыхащIыкIыу, абджыпс хьэпшып­хэм ар кърашэкIыу щытащ. Иджы­рей IэпщIэлъапщIэхэм нартыху тхьэмпэхэр къагъэсэбэпурэ гъуазджэ лэжьыгъэхэр ящI. 
КъБР-м ЦIыхубэ IэпщIэлъапщIагъэмрэ IэпэIэсагъэмкIэ и центрым  и унафэщI Урыс Аслъэни арэзы техъуащ нартыху бзийр лэжьыгъэ щIэщыгъуэхэр къыхащIыкIыну Iэмал зэраIэр, абыхэм щIэупщIэр зэ­рыкуэдыр, апхуэдэ хьэпшып зыбжанэкIэ я центрыр игъэдэхэну зэ­римурадыр. 
- КъБР-м ЩэнхабзэмкIэ и министерствэмрэ Налшык къалэ администрацэмрэ я фIыгъэкIэ, Мысачэ Ве­рэ щылэжьэну, IэпщIэлъапщIагъэм щыхуигъэсэну пэш хухахынущ. Абы екIуалIэ хъунущ пенсэм кIуа нэхъыжьхэр, апхуэдэ лэжьыгъэм ­гу­пыж хуэзыщI псори. Абы сурэтхэр, алэрыбгъухэр, нэгъуэщI гъуазджэ лэжьыгъэхэр щащIыну Iэмал яIэщ, - жиIащ Урыс Аслъэн. - Къапщтэмэ, иджыпсту унэтIыныгъэ 12-м худо­гъаджэ. Абыхэм ящыщщ лъэпкъ фэ­илъхьэгъуэхэмрэ вакъэхэмрэ ды­ныр, дыщэкI IэщIагъэр, хьэпшыпхэр пхъэм къыхэIущIыкIыныр, нэгъуэщI­хэри. Ди лэжьыгъэр зыхуэунэтIар Налшык дэсхэм я зэманыр гъэщIэгъуэну икIи щхьэпэу ягъэкIуэнырщ. 
Жиздюк Маринэ и псалъэм къыхигъэщащ я зэфIэкIхэм хагъэхъуэ­-ну зэрамурадыр. Гъэлъэгъуэныгъэм хэтахэм щIыхь тхылъхэмрэ сертификатхэмрэ иратащ. Зэхыхьэр ягъэдэхащ икIи абы зыкърезыгъэ­хьэлIахэм я нэгу зрагъэужьащ уэрэд­жыIакIуэ-макъамэ Iэмэ­псы­мэхэм еуэ «Поющие укулеле» гу­пым, уэрэджыIакIуэ Шэрий Маринэ, артист Дым Елдар. 

ТЕКIУЖЬ  Заретэ.