Къырал магъаналы байрамлагъа жоралап, Къабарты-Малкъарны Жамауат палатасында республиканы шахарларындан бла районларындан жаш адамлагъа къууанчлы халда паспортла бериу ахшы тёреге айланнганды. Быйыл да 12 декабрьде – Россейни Конституциясыны кюнюнде - анда 14 жыллары толгъан окъуучулагъа бла кадетлеге къууанчлы халда паспортла берилгендиле.
Байрам жыйылыуну ача, палатаны консультанты Тёппеланы Асият сабийлеге Россейни битеу тарыхында 5 Конституция къабыл кёрюлгенин, аланы хар бири жамауат жашаугъа кесини тюрлениулерин кийиргенин, къыралны айныууну жангы атламын ачыкълагъанын эсгертгенди. Ахыр конституцияны къурау бла бир мингден аслам автор юч бла жарым жылны ичинде кюрешгендиле. Аны проектине Президент Борис Ельцин 1993 жылны 8 ноябринде къол салгъанды, 12 декабрьде 58 миллион адам къатышхан референдумда къабыл кёрюлгенинден сора уа, Баш закон кючюне киргенди.
Паспортланы берирден алгъа окъуучулагъа къыралны белгилерини юсюнден викторина да къуралгъанды. Ала Россейни байрагъыны тюрсюнлери къаллай магъананы тутханларын, герб нек керек болгъанын, гимнни сёзлерин бла макъамын кимле жазгъанларын, къыралгъа къаллай бир субъект киргенин, паспортла къачандан бери жюрютюлгенлерин эм латин тилден къалай кёчюрюлгенин айтыргъа керек эдиле. Соруулагъа тюз жууапланы Эльдар Исмаилов, Кантемир Пшуков бла Инал Куашев бергендиле, ала саугъалагъа тийишли болгъандыла.
Сабийлени быллай магъаналы кюнлери бла палатаны башчысы Хазратали Бердов, аны орунбасарлары Людмила Федченко бла Атталаны Жамал, Россейни Жамауат палатасыны келечиси Заурбек Нахушев алгъышлагъандыла.
-Бюгюн сиз абадан жашаугъа биринчи атламыгъызны этесиз. Сиз алыкъа усталыкъ сайларгъа, билим алыргъа керексиз, тутхан ишигизде жетишимли болуругъузну тежейме. Алай мени тилеригим – ата-аналарыгъызны бир заманда да унутмагъыз, алагъа сюймекликни битеу жашауугъузда жюрегигизде ётдюрюгюз. Юйретген устазларыгъыз эсигизде къалсынла. Туугъан республикагъызны, къыралыгъызны сюйюгюз, насыплы болугъуз, - дегенди Хазратали Бердов.
Людмила Федченко уа жаш адамлагъа паспорт алгъанлары бла кёп эркинликле берилгенин, алай аланы жамауатны, къыралны аллында да жууаплылыкълары ёсгенин эсгертгенди. Сиз, къыралыбызны чынтты гражданларыча, законланы тутугъуз, алагъа бузукълукъ этмегиз. Керек кюнде уа Ата журтну къорууларгъа да хазыр болугъуз, дегенди. Атталаны Жамал, бу кюн аланы эслеринде къаллыгъын белгилей, жашау жоллары кенг, ариу, жарыкъ болурун, деменгили къыралда туугъанлары аланы огъурлу ишле этерге кёллендиририн тежегенди. Заурбек Нахушев а бар муратлары толурларын тилегенди.
Аллай ариу алгъышла бла паспортларын Асанланы Амирхан, Ребэкка Индреева, Князланы Алим, Виктория Крамарова, Эльдар Исмаилов, Кантемир Пшуков, Инал Куашев, Ёзденланы Эльмира, Азрет Хамуков, Эристауланы Марат, Дарина Шаова, Алимбек Шадов алгъандыла. Ахырында жаш адамла палатаны келечилери бла бирге суратха тюшгендиле.
