Къабарты-Малкъарны футболдан къыш биринчилигини чемпионатларыны дивизионларыны 10-чу туруну оюнлары бу солуу кюнледе ётгендиле. Биринчи дивизионда кючюн кёргюзтген «Яникой-1961» футбол команда шабат кюн «Спартак-2010» къауум бла аны майданында тюбешгенди. 

Къар да тюшгенине, хауаны температурасы да -10 градусха жууукъ болгъанына да къарамай, яникойчула стадионнга келип, командаларына кёл этдиргендиле. Бу эришиуде оюнланы таймлары жарым сагъат бардырыладыла. Командаланы араларында кюреш биринчи такъыйкъаладан да башланнганды. Биринчи топну спартакчыла урадыла эм 1:0 эсеп бла  командала солургъа кетедиле.

Экинчи таймда къонакъла, тирирек ойнап башлап, эсепни тенг этедиле. Алай, сермешлени биринде спартакчыла жорукълагъа бузукълукъ этгенлери себепли  судья пенальти белгилейди. Аны хайырлана, яникойчула алгъа чыгъадыла. Сора оюн бошалыргъа бир минут чакълы къалгъанлай а, ючюнчю топну «Спартак-2010» команданы къабакъ эшиклерине кийирип, «Яникой-1961» кезиулю хорлам болдурады.

Голланы Сарбашланы Руслан, Хуболланы Аслан эм Зокаланы Азамат ургъандыла. Команданы тренер Малкъондуланы Мунир юйретеди.

Шёндю Яникойну командасы турнир таблицада 2-чи жерде орналады. Битеу да бу дивизионда 16 команда эришедиле.

Таппасханланы Аминат.