КъБР-м и Журналистхэм я зэгухьэныгъэм и правленэм и япэ зэIущIэр вэсэмахуэ екIуэкIащ. Абы и уна­фэщI Жыласэ Заурбэч жи­Iащ илъэсым Iуэ­ху гуапэкIэ зэрыпежьар.

Урысей Печатым и махуэм ири­хьэ­лIэу, КъБР-м и Журналистхэм я зэгухьэныгъэм и щIыхь тхылъкIэ республикэм и хъыбарегъащIэ IэнатIэ зэ­хуэ­мыдэхэм я лэ­жьа­кIуэ зыбжанэ ягъэ­лъэ­пIащ. «Ды­зы­техьа илъэсыр тхуэфIыну, лэжьыгъэ куп­щIа­фIэ къыдэхъулIэну, нэхъыщ­хьэращи, гугъуехь щыIэхэр къызэ­рызэ­д­нэкIынум я хэ­кIы­пIэхэр къэд­гъуэтыну сы­нывохъуэхъу», - къыхигъэщащ Жыла­сэм. 
ЗэIущIэм хэтащ КъБР-м Бжыгъэр зи лъабжьэ зыу­жь­ы­­ны­гъэмкIэ, связымрэ цIы­ху­бэ зэпыщIэ­ныгъэхэмкIэ и министр Бозий Аскэр. Абы жиIащ: «ХъыбарегъащIэ Iэмалхэм, махуэ къэс жыхуаIэм хуэдэу, за­хъуэж, заужь, электрон  къы­дэкIыгъуэхэм, социальнэ сетхэм заубгъу. Ауэ журналистым и лэжьыгъэм и мы­хьэнэмрэ купщIэмрэ абы химыгъахъуэмэ, нэхъ мащIэ ищIыр­к­ъым. Иджыри 2000 гъэм тыгъэ къысхуащIауэ щы­тат Совет щIэнгъуазэ тхылъыш­хуэр дискищым тетхауэ. Зы библиотекэ цIыкIу щIэхуэн хуэдиз хъугъуэфIыгъуэр абдеж къызэрыщыб­гъуэтыфыр ди адэм игъэщIагъуэрт. Иджыпс­ту хъыбар къыпIэ­ры­хьэ­ну гугъукъым, арщхьэкIэ ахэр куэдыщэ ­хъуащи, уи фIэщ пщIынумрэ дзыхь зэбгъэзынумрэ зэхэ­гъэкIы­гъуейщ. Абы и лъэныкъуэкIэ журналистым игъэзащIэ ­къалэныр инщ, хъыбарым и пэжыпIэр цIыхум деж негъэсыф. Нэгъабэ «Инфорум» зэхыхьэшхуэр Урысейм и Журналистхэм я зэгу­хьэ­ныгъэм Налшык зэ­рыщ­ри­гъэкIуэкIар ди ехъулIэ­ны­гъэхэм ящыщу къы­­золъытэ, мис апхуэдэ IуэхуфI­хэм ды­хуейщ, дызэчэнджэ­щын, хэ­кIыпIэхэр къэд­гъэ­лъэ­гъуэн папщIэ. Дыщогугъ ды­зы­техьа илъэсми лэжьыгъэ куп­щIафIэ здедгъэкIуэну, ми­нистерствэм абы и ­къару ири­хьэлIэнущ».
ХъыбарегъащIэ IэнатIэм хэлъхьэныгъэ хуащIыр къалъытэу, зэIущIэм КъБР-м и Журналистхэм я зэгухьэныгъэм и щIыхь тхылъыр щратащ «Адыгэ псалъэ» газетым и сурэттех Къарей Элинэ, «Къэ­бэрдей-Балъкъэр» КъТРК-­м и корреспондент Бей­тыгъуэн Iэсият, «Къэбэрдей-Балъкъэр» ВТК-м и нэтынхэм щыщ езыгъэкIуэкI­хэу Що­джэн Лаурэрэ Джэду Сакинатрэ, «Къэбэрдей-Балъкъэр» КъТРК-м и хъыба­рыщIэхэр езыгъэкIуэкI Къардэн Азэмэт, «Заман» газетым къыдэзыгъэкI и редактор Кетенчиевэ Зульфия, «Ка­бардино-Балкарская прав­да» газетым и редактор Накуэ Ольгэ, «Прохладненские известия» газетым и корреспондент Еремеевэ Иринэ сымэ.
КЪАНЩАУЭ
Мэлычыпхъу.
Сурэтыр Къарей Элинэ трихащ.