2025 гъэм и иужьрей махуэхэм «Шайбу, шайбу!» фIэщыгъэр зэрихьэу Налшык къалэм и «Налшык-Аренэ» IэрыщI мыл зэрылъ уардэунэм хоккеймкIэ зэхьэзэхуэ щекIуэкIащ. Абы щызэпеуащ а щIымахуэ спорт лIэужьыгъуэм япэ лъэбакъуэхэр щызыч сабийхэмрэ нэхъыжьхэмрэ, гупитIу гуэшауэ.

«Республикэм хоккейм щыдихьэххэм я бжыгъэм къыхэхъуэ зэпытщ. Япэ зэхьэзэхуэр едгъэкIуэкIа нэужь, абы зыхуэзыгъэсэну щIэхъуэпс цIыкIухэм процент 20-30-кIэ къахэхъуащ. Ди мурадщ, мыпхуэдэ зэIущIэхэр нэхъыбэрэ едгъэкIуэкIыну, сабийхэм закъедгъэцIыхун, уеблэмэ хоккейм ахэр къыхэтшэн папщIэ», - жиIащ КъБР-м ХоккеймкIэ и федерацэм и тхьэмадэ Адамаев Сергей.

Апхуэдэуи абы жиIащ зэхьэзэхуэм хэтыну Дон Iус Ростов къалэм, Ставрополь крайм, Осетие Ищхъэрэ – Аланием я командэхэр Налшык къызэрыкIуар.

ИрагъэкIуэкIа зэпеуэхэм нэхъыжьхэм я деж щытекIуащ ЕсэнтIыгу къалэм и лIыкIуэхэр. ЕтIуанэ хъуащ Владикавказ къалэм и хоккеистхэр.

 НэхъыщIэ цIыкIухэм я деж япэ увыпIэр щиубыдащ Ставрополь къалэм и командэм. Дыжьын медалыр къахьащ Новошахтинск къикIа гупым. Къэбэрдей-Балъкъэрым и гъэсэнхэр мыбдежым ещанэ щыхъуащ. 

 «Аланием» и командэм и гъуащхьэтет Мальцев Макар хоккейр къыщIыхиха хъуамкIэ къыддэгуашэу жиIащ, а спорт лIэужьыгъуэр цIыхухъу нэсхэм ейуэ къызэрилъытэр икIи Къэзан и «Ак Барс»-м щыджэгуну зэрыхъуапсэр, ар зэриплъапIэр.

КЪУЭЖЕЙ Iэмин.