Жангы жылны биринчи кюнюнде Нальчикни Атажукин атлы маданият эм солуу паркында «Сёз бергенибизге аталгъан чабышыу» деген ат бла спорт-оюн эришиу баргъанды. Аны юсюнден бизге Къабарты-Малкъарда китапны сюйгенлени биригиулерини председатели, дайым бу акциягъа къатышып тургъан Наталья Шинкарёва хапар айтады.

– Наталья Петровна, кимни проектиди бу? Бизде бу спорт-оюн эришиу къалай бла жаратылгъанды?

– 2015 жылда 1 январьда бу тюрлю спорт бла кюрешгенлени Москвада Лужникледе «Мен чабаргъа сюеме» деген клублары чыкъгъанды бу эришиуге. Ала, 800 адам болуп, ойнай-кюле 2015 мерт чапхандыла, келлик жылда толтурургъа сюйген муратларын айта. Эки жылдан аланы саны алты мингден озгъанды. 2020 жылда уа – онжети минг, быйыл а отуз минг окъуна болгъанды. Саулукълу жашау халны сайлайдыла кёпле. Бюгюн бу тюрлю эришиуле, мен билип, Россейни жюз бла отуз шахарында, дагъыда болурла къошулгъанла, онбиринчи кере барадыла. Битеу дуниягъа да жайылгъандыла. Биз а ючюнчю кере къатышабыз бу тюрлю чабышыулагъа. Хар жерде да бир кюнде, бир заманда башланады эришиу. Спорт бла байламлы болса да, бу оюн халлы чабышыуду. Ненчанчы жыл болса, анча метр чабаргъа керекбиз. Бу оюн битеулю флешмобха айланнганды.

– Сора, мен ангылагъандан, спортчула бу оюнну халкъгъа ётдюргендиле. Бизни республикада бу ишни къурагъанла, анга къатышханла, къатышыргъа боллукъла да кимледиле?

– Анга ким да къатышыргъа боллукъду. Къабарты-Малкъарда Россей Федерацияны Шимал жюрюу (РФСХ) деген биригиуюню бёлюмю барды. Ма ол биригиу бла республиканы Жамауат палатасы бирге болдурадыла бу оюн ишни. Къатышханла уа башында сагъынылгъан биригиуню, Жамауат палатаны келечилери, «Анна» атлы валеология клубну, китапны сюйгенлени биригиулерини членлери. Ала, эллиден артыкъ адам, алдан жазылгъанла эдиле. Бизге дагъыда жангы адамла къошулгъандыла: энчи аскер операцияны ветеранлары, «Ата журтну къоруулаучула» деген фондну республикалы координаторлары, шахарчыла, курортха келгенле, башха къонакъла да. Тюз алайчыкъда кёкюреклерине тагъаргъа номерле да алгъандыла.

Къалайда башланнганды чабышыуугъуз?

– Атажукин атлы маданият солуу паркда баш аллея барды. Алайда Жулдуз ташдан башланыучуду.

– Муратланы белгилеген адет а неди?

– Алайда номерли къагъытлада хар бири жангы жылдан не сакълагъанларын, къаллай муратлары болгъанын белгилейдиле. «Сёз толургъа болады, сакъ болугъуз», – деп юйретедиле бизни. Дагъыда, баям, ол халкъ аллында, нёгерлеринги аллында берген сёзюнгю толтурургъа итинмей болалмайса. Бегимге кёре, чабышыуда сен аны юсюнден сагъыш этерге, аны башхала да эшитирча айтыргъа, белгилегенимча, жазаргъа керексе.

– Кертисин айтханда, Жангы жылны биринчи кюнюнде эрттенликде бу оюннга къатышыу хар кимни да бирча тепдираллыкъ сунмайма жеринден?

– Магъанасы да алайды. Ол сени башхалагъа ушаманынгы кёргюзтеди. Бу чабышыу муратынга элтирик биринчи атламынг болуп чыгъады. Андан ары атламларыбыз тынч боллукъ сунабыз мен да, мени нёгерлерим да.

– Бир адамны мураты башхасына ушамайды. Асламысында не мурат этедиле адамла?

– Жангы жылда ата-анагъа тынгыларгъа, иги ишле этерге, иги окъургъа, юй ишлерге, фатар, машина сатып алыргъа, спортда, башха ишде бийик жетишимле этерге, насыплы, саулукълу болургъа, юйюр къураргъа сюйгенле да тюбейдиле.

– Бир ненча затдан умут этерге уа боламыды?

– Ол жаны бла чек жокъду. Ненча сюйсенг да.

– Чабышыугъа къалай жазылыргъа болады?

– Интернетде «Забег обещаний» деп барды. Ары кирип, жазсанг, къайсы шахардан болсанг да, санга номер жибередиле. Анга жазаса муратларынгы.

– Хайыры, адамгъа игилиги недеди бу тюрлю ишни?

– Биринчиден, бу оюнду. Олтуруп не жатып турмайса. Хар ким жукълап тургъанда, таза хауада айланыргъа чыгъаса. Не десенг да, жангы жылны алай башлагъанынг иги белгиди. Къымылдау – ол жашауду. Холодильникден да айырыласа бир къауум заманнга. Ол да иги саулугъунга. Кёп жылланы эсинге келип, жетишалмай тургъан муратынгы кёплени ичинде айтсанг, анга жол ызларыгъынг келмей амалы жокъду. Ол сени тининге киреди. Бу оюн байрам болгъанын эсге алсанг а, ол жангы кюч-къарыу береди. Сора кесингча къууанчлы, насыплы адамланы араларында болуп, жюрегинг, сезимлеринг да жангырып, кеси кесинге ыразы болуп, къайтаса юйюнге.

– Юйюрлери бла келгенле уа тюбеймидиле анда?

– Юйюрлери бла угъай, итлери, киштиклери бла келгенле да бардыла. Быйыл хал болмагъанча къууанчлы эди. Къар Аппа, Къар къызчыкъ да келген эдиле. Жылдан-жылгъа алай бола, кенг жайыла барады бу акция.

– Наталья Петровна, не айтырыкъ эдигиз «Заман» газетни бетлеринден окъуучулагъа бюгюн?

– Келген жангы жылыгъыз ахшы умутланы толгъанлары бла белгиленсин! Саулукълу, узакъ ёмюрлю болугъуз!

Ушакъны Мусукаланы Сакинат бардыргъанды.