Быйыл газетибиз «Таулу къыз» деген конкурсну сау жыл бардыргъанды. Анга кёре редакциягъа жиберилген суратла басмаланнганларындан тышында, ВКонтакте социал сетьде да чыкъгъандыла. Бу жумушну башлагъаныбызны баш мураты – социал сетьлеге аслам эс бургъан жаш тёлюню ана тилибизде чыкъгъан «Заман» газетни юсюнден не къадар кёп билирча этерге эди.
Алай бла, конкурсубузгъа битеу да 20 къыз къатышханды. Аладан окъуучуларыбыз къайсысы ючюн кёп къол кётюрселе, ол хорларыгъын алгъадан ачыкълагъан эдик. Бу кюнледе уа редакция эришиуню эсеплерин чыгъаргъанды. Санаулагъа кёре, биринчи жерге Тырныаууздан Омарланы Алмаза чыкъгъанды. Экинчиге Хасаниядан Кючюкланы Жаннета эм ючюнчюге биягъы тырныауузчу къыз Къочхарланы Марина сайланнгандыла.
Мен ол социал сетьни бардыргъан кезиуюмде, кёп жашла, энчи билдириулеге къайсы къызны жаратханларын билдирип, аланы энчи телефонларын, къайда жашагъанларын да сурай эдиле. Телефон номерлерин бермесем да, къайда жашагъанларын а жашырмай эдим. Ким биледи, бизни болушлугъубуз бла жангы юйюрле къуралырла эсе уа, ол да игиди.
Газетибизни эрттеден алгъанланы эслеринде болур алгъын да быллай «Айсурат» деген конкурс бардыргъаныбыз. Ол кезиуде, мен билгенден, къызланы газетде суратларын кёрюп, жаратып, ызы бла танышып, юйюрле да къуралгъан эдиле. Бу жол да аллай къууанчлы жумушла болсала, бек сюерик эдик...
Сайланнган къызла уа редакциягъа чакъырылып, къууанчлы халда саугъаланнгандыла. Кертиди, аладан бири – Омарланы Алмаза – Саратов областьда ишлегени себепли, кеси келалмагъанды. Аны саугъасы ол кюн анасыны эгечи Жаболаны Аминагъа берилгенди.
Саугъала уа энчи болгъандыла – «Заманда» ВКонтакте социал сетьде суратлары салыннган футболкала, тукъум атлары эм «Заман» деп жазыулары бла омакъ блокнотла, ручкала, жазыучуларыбыз Табакъсойланы Мухтарны бла Мамайланы Алийни китаплары, дипломла эмда гюлле.
Саугъалауну газетни баш редактору Къонакъланы Хасан бардыргъанды. Къызларыбызны юслеринден айта, ол ала бары да жетишимлиле, миллетибизни атын иги бла айтдыргъанладан болгъанларын чертгенди.
- Омарланы Алмаза Саратов областьны Арбитраж сюдюнде ишлейди. Кючюкланы Жаннета КъМР-ни Нотариал палатасында инспекторду. Къочхарланы Марина уа бийик категориялы педиатрды, Быллым элни амбулаториясында ишлейди. Аны айтханым, жетишимли, адепли жаш адамларыбызны газетибизни бетлерине тюшгенлери бек аламатды. Мындан ары да окъуучуларыбызны сейирлерин ёсдюрюр мурат бла тюрлю-тюрлю конкурсла къурар акъылыбыз барды, - деп чертгенди Хасан Азретович.
Жазыучу эм журналист Османланы Хыйса да къызлагъа алгъыш эмда насийхат сёзлерин айтханды, мындан ары да хорламлыла болурларын тежегенди.
Таппасханланы Аминат
