КъМР-ни Башчысы Казбек Коков Жаякъ-бет, пластика эмда стоматология хирургияны Шимал-Кавказ илму-практика арасын жокълагъанды.

 Шёндюгю заманнга келишген бу медицина учреждение  борчлу халда медицина страхованияны системасына киреди.
2018 жылдан бери ОМС-ни полюсу бла анда  аберилерин ачытхан, бетлери, жаякълары бла байламлы ауруу тапхан, башларында бла боюнларында кёпгенлери болгъан, зыянлары бла туугъан неда артда чып тюшген 780-ден артыкъ саусузгъа болушлукъ берилгенди.
Аны къурамына  хирургия, анестезиология, кюндюзгю стационар, поликлиника, клиника-диагностикалы лаборатория эмда  башха бёлюмле киредиле.
Шёндюгю алчы оборудованияны хайырындан анда бек къыйын операцияла этиледиле эмда терк болушлукъ бериучю службасы уа кече-кюн да солуугъа бёлюнмей ишлейди.
Андан сора да, бу ара стоматология жаны бла  специалистлени къурауда Къабарты-Малкъар къырал университет бла байламлыкъда ишлейди. Студентлеге бир жолгъа 200 адамны сыйындыргъан 12 классдан окъутуу-клиника модуль къуралгъанды.
Клиникада илму-тинтиу ишле да бардырыладыла, аурууланы бла жараланы тохташдырыу, аладан багъыу  жаны бла къыйматлы амалла жарашдырыладыла.
Жандауурлукъ да араны ишини магъаналы кесегиди. Аны эсеплери сейир этерчадыла – 120-дан аслам сабий тынгылы медицина болушлукъ алгъандыла. Араны кесини энчи жандауурлукъ программасына кёре бетлеринде зыянлары болгъан сабийлени реабитациялау бардырылады.
Клиника къыралны белгили специалистлери бла бирге ишлейди. Ала къыйын саусузланы аурууларын тюз тохташдырыугъа эмда алагъа багъыугъа къатышадыла.
Казбек Коков Жаякъ-бет, пластика эмда стоматология хирургияны Шимал-Кавказ илму-практика арасыны башчысына профессор Мустафаланы Магометге республиканы саулукъ сакълау бёлюмюн айнытыугъа уллу къыйын салгъаны ючюн жюрек ыразылыгъын билдиргенди. Коллективге уа Къабарты-Малкъаргъа хайырлы ишлеринде жангы жетишимле тежегенди, деп билдириледи КъМР-ни Башчысыны телеграм-каналында.

Текуланы Хауа хазырлагъанды