Бу кюнледе адабиятны сюйгенле Элбрус районда Къулийланы Къайсын атлы Маданият юйде жыйылгъан эдиле. Аланы бирлешдирген, тюбешдирген а жазыучу эм назмучу Ахматланы Танзиляны чыгъармачылыгъы болгъанды. Юч китапны авторуду Танзиля. Ала бла малкъар тилни дерслеринде хайырланадыла. Не букъдурур кереклиси барды, бизни адабиятда арт заманда жангы ауазла хазна эшитилмейдиле. Хар малкъар тилде жазгъан, бютюнда сабийлеге, бек магъаналы ишни тындырады. Саулай ингир, ариу жыргъа ушап, бийик даражада баргъанды.
Элбрус районну администрациясыны башчысы Отарланы Мухтар келгенлеге алгъыш сёз айтханды. Ызы бла Ахматланы тукъумларындан кёп белгили адам чыкъгъанын белгилегенди. Кертиси бла да, жаннетли болсунла, барыбыз да таныгъан хурметли профессорла Ахматланы Ибрагим бла Мусса къаллай бир жаш адамгъа болушхандыла, илмугъа къаллай къошумчулукъ этгендиле. Бусагъатда университетде ишлеп тургъан филология илмуланы доктору Ахматланы Мариям, шаптал тереклени битеу Шимал Кавказгъа жайгъан селекционер Ахматланы Зулейха, республикабызда белгили жолчуладан бири Ахматланы Мурадин, поэтесса Ахматланы Люба …газет бет да жетерик тюйюлдю Ахматланы битеу да белгили адамларын санаргъа.
Отарланы Мухтар Танзилягъа малкъар адабиятха къошумчулукъ этгени ючюн жюрек ыразылыгъын билдиргенди эм Ыразылыкъ къагъыт бергенди. Андан сора да саугъасы бар эди – кийиз.
- Тиширыу болгъан тынч тюйюлдю, алай тиширыу да, поэт да болгъан а бютюнда къыйынды. Тутхан жолунгда насыплы бол! Миллетибизни атын айтдырыучу бол. Тилибизни, маданиятыбызны, ёмюрледен келген хазнабызны миллетибиз окъуп, билип, тамблагъы кюнюбюзге къууанч бла атлайыкъ, - дегенди Ахматланы Люба да. Баям, Жангы жылны аллында андан иги алгъыш табаргъа къыйынды.
КъМР-ни Жазыучуларыны биригиуюню башчысы Байтуугъанланы Исмайыл да Танзиляны жангы, бусагъатда чыкъгъан ючюнчю китабы бла алгъышлагъанды, сора Ахматланы Любагъа бла Ёзденланы Женягъа Россейни Жазыучуларыны союзуна киргенлерине шагъатлыкъ къагъытланы бергенди. Ол да бек огъурлу иш болгъанды.
Дагъыда ингирде кёпле сёлешгендиле. Ол санда «Минги-Тау» журналны баш редактору Додуланы Аскер, Мечиланы Кязим атлы фондну башчысы Аппайланы Лариса, жамауат ишчи Ахайланы Лариса эм башхала. Ала барысы да Танзиляны чыгъармачылыгъыны юсюнден айтхандыла.
Энчи Танзиляны малкъар тилни иги билгенин чертирчады. Ол Нальчикде туугъанды, Быллымда ёсгенди. Биз тау эллерибизде эшитилген шатык тилни аны чыгъармаларында кёребиз. Жарсыугъа, кёп сёзлерибиз унутула барадыла. Хар унутулгъан сёз – ёчюлген жулдузду. Танзиля уа ол кете баргъан сёзлени къайтарады. Не сейир, аны назмуларында, жомакъларында ол хайырланылмагъан, эски сёзле жангыдан солуу алып, жашап башлайдыла. Мен бу кюнледе сабийлеге деп жазылгъан назмуларын, жомакъларын къайтарып окъуп тургъанма. Ийнаныгъыз, ала уллулагъа да бек хычыуун кёрюнедиле. Бюгюнлюкде асламысында орус тил бла хайырланнганыбыз себепли, ана тилибизге тансыкъ болгъанбыз. Элбрус районда малкъар тил алай иги эшитиледи, башха къырал тилле бла тенг. Энди хар таулуну жашауунда да алай эшитилсе эди.
Бу адабият ингирде сейирлик, къууандыргъан ишле кёп болгъандыла. Залда жаланда таулула угъай, къабартылыла да бар эдиле. Энчи жашауунда Танзиля насыплыды. Баш иеси Тимур Каров бла эки ариу къызны бла бир жигит жашны ёсдюредиле. Жашлары Ибрагим магистратурада окъуй турады. Абадан къызлары Амина Къабарты-Малкъар къырал университетни медицина факультетини экинчи курсундады, гитчелери Алина сегизинчи классны окъуучусуду.
Каровланы уллу тукъумлары келинлерин бек багъалайдыла. Тукъумларыны атындан келечилери да кёп алгъышла айтхандыла.
Дагъыда байрамда Танзиляны устазларына энчи эс бурулгъанды. Омарланы Аслижан Исмайыловна биринчи устазы болгъанды Быллымны школунда. Ол сахнагъа чыкъгъанда, жыйылгъанла жюрек ыразылыкъларын къызыу къарсла бла билдиргендиле. Устазы окъуучусуна жангы жетишимле тежегенди. Быллымны Маданият юйюнден сабийле назмула да окъугъандыла, театр маталлы сценкала да кёргюзтгендиле.
Ана тилден устазы уа Барасбийланы Жаухар Кальмоевна болгъанды. Ол да кёп ариу сёзле айтханды Танзилягъа. Устазны ыразылыгъы ата-ананы ыразылыгъыча багъалыды.
Филология илмуланы кандидаты Торогельдиланы Зухура назмучуну чыгъармачылыгъына бийик багъа бергенди, аны адабиятда биринчи атламларыны юсюнден да айтханды.
Ташлы-Таладан «Ийнар» жырчы къауумну таматасы Гузийланы Тахир да алгъышлагъанды Танзиляны, сора Байсыланы Элдар бла жыр да саугъалагъандыла. «Ийнарны» битеу халкъ байрамларыбызгъа къатышханы бек аламатды. Бир бирге билеклик этмесек, тышындан келип къурарыкъ тюйюлдюле бизни жашауубузну. КъМР-ни маданиятыны сыйлы ишчиси Ботталаны Мурат, Ахайланы Лариса да алгъыш сёзле айтхандыла.
Элбрус районну Маданият управлениясыны башчысы Толгъурланы Жаннетни ишин а энчи белгилерчады. Бу районда адабият ингирлеге, кёрмючлеге, байрамлагъа терк-терк жыйылабыз, ала аламат ариу халда ётедиле. Ахматланы Танзиляны чыгъармачылыгъына аталгъан жыйылыуну юсюнден айтханда уа, аны бардырыргъа бизни журналистибиз Темуккуланы Асият да болушханды. Ёзденланы тукъумлары (Танзиляны анасы Ёзденладанды) аны сахнагъа чакъырып, жюрек ыразылыкъларын билдиргендиле.
Поэт Ёзденланы Исмайыл а, хунерли эгечини юсюнден сёлеше, былай дегенди: «Фахму жилтинни бергенди санга Аллах. Аны ёсдюр, айныт!» Сахна уа гюлледен толу эди. Байрамгъа Джаппуланы Ахматны эм «Ийнар» къауумну жырлары, «Арабеск» эм «Салам» ансамбльлени тепсеулери, Тырныауузда Маданият юйню ишчилери эм сабийле окъугъан назмула энчи къууат салгъандыла.
Ингирни ахырында Ахматланы Танзиля сахнагъа чыкъгъанда, кёлю толуп, бир кесек заманны сёлешалмай тургъанды. Ызы бла ол битеу къонакълагъа эм бу ариу байрамны къурагъанлагъа жюрек ыразылыгъын билдиргенди.
Байсыланы Марзият.
