Дыгъэгъазэм и 27-р Урысейм и КъегъэлакIуэм и махуэщ. Нобэ илъэс 35-рэ ирокъу Урысейм Къы­зэрымыкIуэ щытыкIэхэмкIэ и министерст­вэр.

А лъэхъэнэм IэнатIэр зэтеуващ, дэIэпыкъуэгъу­ хъуну хьэзыр цIыхухэм я лIыгъэмрэ IэщIагъэмрэ я дамыгъэ хъуащ. Нобэ Урысей МЧС-р сыт хуэдэ щытыкIэ гугъуми зэпэщу бгъэдыхьэф IэнатIэ лъэщщ. 
Урысей МЧС-м и Управленэ нэхъыщхьэу Къэбэрдей-Балъкъэр Республикэм щыIэм екIуу зэфIегъэкI къызэрымыкIуэ щытыкIэхэр къэмыгъэхъу­ным­рэ апхуэдэхэм я лъэужьыр гъэкIуэдыжынымкIэ я къалэнхэр.  
IэнатIэм и лэжьакIуэхэр махуэ къэс,  я гъащIэм емыблэжу,  пэрохьэ цIыхухэр мафIэсхэм, псы-дзэхэм, щIы хъейхэм, нэгъуэщI къызэрымыкIуэ щы­тыкIэхэм къыщегъэлыным.  
ЛэжьакIуэхэм я псэемыблэжагъыр къыщагъ­э­лъа­гъуэ дэтхэнэ Iуэхуми.  А IэщIагъэм ирилажьэхэм я хьэл-щэным щынэхъыщхьэр къы­зэрымыкIуэ щытыкIэхэми нэгъуэщIхэми  деж   зэ­щIэкъуауэ, мыгужьейуэ я къалэнхэр ягъэ­зэщIэ­нырщ. Дэтхэнэми къыгуроIуэ IэщIагъэм пылъ шынагъуэр, ауэ цIыхухэм ядэIэпыкъуну зэрыхуейр япэ ирагъэщ. Абыхэм псом хуэмыдэу куууэ зыхащIэ  жыла-гъуэм деж щаIэ  жэуаплыныгъэшхуэр, хуэныкъуэ дэтхэнэми зыщIэгъэкъуэным хуэхьэзыру щытын зэрыхуейр.  
Нобэ IэнатIэм игъэлъапIэ юбилейм   дигу къегъэкIыж махуэ къэс ди къэралым и дэтхэнэ цIыхуми и гъащIэм хуэсакъхэм яхуэфащэ гулъытэ яхуэ­щIыным мыхьэнэшхуэ зэриIэр.    
КъызэрымыкIуэ щытыкIэхэмкIэ министерствэм щылажьэхэм мы махуэм псалъэ дахэ хужаIэ, щIыхь тхылъхэмрэ дипломхэмрэ ират, цIэ лъапIэхэр хуа­гъэфащэ, хъуэхъу телеграммэхэм къахуоджэ.
ФIыщIэ фхудощI фи лIыгъэм, Iуэхум  фызэ­рыхуэпэжым папщIэ. 

УЭРДОКЪУЭ Женя.