МЧС-ни регионда Баш управлениясыны келечилери «Къан бер да – адамны жанын сакъла!» деген жандауурлукъ ишлерин тёрели халда  бардырадыла. Бу жол да, ведомствону 35-жыллыгъына атап, ала Къан алыу станцияда жыйылгъандыла. Акциягъа 30-дан аслам инсан къатышхандыла, ала битеу да 13 литрден аслам къан бергендиле.

Къутхарыучуланы араларында къан дайым да бергенле, станциягъа биринчи кере келгенле, «Сыйлы донор» деген атха тийишли болгъанла да бардыла. Къан алырны аллында медикле аланы саулукъларына къарагъандыла, къан басымларын, гемоглобинни ёлчемлерин ёнчелегендиле. Ызы бла хар бири да 450 миллилитр къан бергендиле.  

Ведомствода белгилегенлерича, МЧС-ни келечилери бу огъурлу ишге кеслерини ыразылыкълары бла дайым къатышадыла. Къан эмда плазмадан препаратла къыйын ауругъан адамлагъа терк-терк керек болуучуду, арт жыллада  уа донор къан изленнген кезиуле бютюн аслам чыгъадыла. Аны ючюн къутхарыучула жамауатны саулайда бу ишге къошулургъа чакъырадыла.

Кульчаланы Зульфия.