Олимп джэгухэм хыхьэ тхэквондо лIэужьыгъуэмкIэ (ВТФ) Урысей Федерацэм и чемпионатрэ (я Iэпкълъэпкъым сэкъат зиIэ спортсменхэрщ зэпеуар) «Iуащхьэмахуэм и Кубокыр» къэхьыным хуэунэтIа зэхьэзэхуэрэ Налшык къалэм и «Гладиатор» спорт комплексым иджыблагъэ щекIуэкIащ. 
Чемпионатым хэтащ УФ-м и щIыналъэхэм ящыщу 17-м я спортсмен 71-рэ. Абы щытекIуа, Дагъыстэным и лIыкIуэ Магомедов Щамил къыхигъэщащ Кавказ Ищхъэрэм щрагъэкIуэкI зэхьэзэхуэхэм бжьыпэр щыбубыдыну зэрымытыншыр, уи зэфIэкIымрэ Iэзагъымрэ я гъэунэхупIэу сыт щыгъуи ахэр зэрыщытыр. 
«Iуащхьэмахуэм и Кубокым» кърихьэлIащ ди къэралым и щIыналъэхэм ящыщу 18-м я спортсмен, щIалэхэри хъыджэбзхэри зэхэту, 300-м щIигъу. Къэбэрдей-Балъкъэрым и спортсменхэм щыщу я хьэлъагъ елъытауэ зыхэта гупхэм япэ увыпIэхэр къыщахьащ Къурмэн Эмилие, Шыд Ясминэ, Степан Валерэ, Iусен Руслан, Дзу Къасболэт, Жашуевэ Айлэ, Асановэ Дарьянэ, Хьэмырзэ Амырхъан, Мосян Данил сымэ. 
Джэш Имран, Шарифовэ Сарэ, Абрэдж Айдар, Хьэжы Азалие, Бей Инал, Гапонов Роман, Самедов Намик, Торгашевэ Ульянэ, Ахаевэ Даринэ сымэ етIуанэ хъуахэщ. 
Ещанэ увыпIэхэр къахьащ Бакъей Миланэ, Къуэныкъуей Эмилие, Къып Эмилие, Гусалов Алихъан, Абдурахмановэ Миланэ, Ерыжокъуэ Аланэ, Антоненкэ Аделинэ, Къэзанш Къамболэт сымэ. 
«Iуащхьэмахуэм и Кубокым» япэ увыпIищыр къыщызыхьахэм спорт разряд зэхуэмыдэхэр ягъэзэщIащ, медалхэр, щIыхь тхылъхэр, кубокхэр, саугъэт лъапIэхэр иратащ.
Ди командэм и тренерхэр Унэжокъуэ Абдельджэбар, Уэзрокъуэ Анзор, Хъурей Беслъэн, Хан Станислав сымэщ. 
ХЬЭЩЫКЪУЕЙ Олег.