Темыркъан Юрэ и цIэр зе­зыхьэ Къэрал концерт гъэ­лъэгъуапIэм дыгъэгъазэм и 18-м щекIуэкIащ Къэбэрдей-Балъкъэрым и цIыхубэ, усакIуэ, КъБР-м и Къэрал саугъэтым и лау­реат, Хэку зауэшхуэм и ве­теран Отаров Керим и фэеплъ пшыхь. Абы утыку къыщ­рахьащ «Жизнь замечательных людей» серием хыхьэу, Гуреев Максим тха­кIуэм, режис­сё­рым, сценаристым иджыб­лагъэ Москва къыщыдигъэ­кIа «Керим Отаров» тхы­лъыр.

Зэхыхьэр къызэрагъэпэщащ КъБР-м ЩэнхабзэмкIэ и министерствэмрэ КъБР-м и Тха­кIуэхэм я зэгухьэныгъэм­рэ. Балъкъэр литературэм и лъабжьэр зыгъэтIылъахэм ящыщ усакIуэм теухуа зэ­хыхьэм зрагъэхьэлIащ республикэм и унафэщIхэм, уса­кIуэм и тхыгъэхэр фIыуэ ­зы­лъагъухэм, литературэм, щэн­­хабзэм, гъуазджэм я цIыхухэм, жылагъуэ лэжьакIуэхэм, Отаровхэ я лъэпкъым щыщхэм. 
IуэхущIапIэм и пэIущIэ пэ­шым къыщызэрагъэпэщат уса­кIуэм и гъащIэмрэ гуа­щIэмрэ теухуа гъэлъэгъуэ­ныгъэ. Абы хагъэхьащ Отаров Керим и лэжьэгъухэм, ныбжьэгъухэм, унагъуэм я ­гъусэу зытригъэхауэ щыта су­рэтхэр. ХьэщIэхэм зыщагъэгъуэзащ усакIуэм теухуауэ къы­­дэкIа тхылъхэм. Ар ягъэ­хьэ­зыращ КъБКъУ-м и библиотекэм и лэжьакIуэхэм. 
КъБР-м щэнхабзэмкIэ и министр Къумахуэ Мухьэдин зэ­хуэ­сахэм ягу къигъэкIыжащ усакIуэм и гъащIэмрэ и лэ­жьы­гъэмрэ. 
Отаров Керим Совет Союз псом къыщацIыхуу щытащ. Балъкъэр литературэм хэлъ­хьэныгъэфI хуэзыщIа уса­кIуэш­хуэр Тырныауз къалэм къыщалъхуащ. Педучилищэр къиуха нэужь, КъБР-м и пед­ин­ститутым щIэтIысхьащ. Хэку зауэшхуэм хэтащ. И лъэп­къэгъухэм я гъусэу Къыр­­гъыз ССР-м ягъэIэпхъуэри, Бишкек къуажэм щыпсэуащ.
УсакIуэм и япэ усэ тхылъыр къыдагъэкIащ 1930 гъэм. 1936 гъэм ар хагъэхьащ ­СССР-м и ТхакIуэхэм я зэгу­хьэ­ныгъэм. 1938 гъэм ­КъБАССР-м и ТхакIуэхэм я зэгухьэныгъэм и унафэщI ­хъуащ. Балъкъэрхэр я щIыналъэм щрагъэIэпхъукIам, и лъэпкъэгъухэм я гъусэу Къыр­гъызым щыIащ. 1956 гъэм Налшык къигъэзэжа нэужь, «Шуехлукъ» («Дружба») журналым щылэжьащ. Хэку зауэшхуэм щызэрихьа лIыгъэмрэ хахуагъэмрэ ­папщIэ къыхуагъэфэщащ «Вагъуэ плъыжь» орденыр. Отаровым и Iэдакъэ къыщIэ­кIахэр я гъуджэщ ар зыхэп­сэукIа зэманым. Абы и щIэ­ин­хэр Хэку лъагъуныгъэ­кIэ гъэнщIащ, къэралым и зыу­жьыныгъэр, гуащIэ­рып­сэухэм я лэжьыгъэ хьэлэ-лыр, щIыналъэм и дахагъэр, и лъэпкъым и тхыдэр къызэ­щIаубыдэу. УсакIуэр куэд щIауэ къытхэмытыжми, абы и ­IэдакъэщIэкIхэр цIыхубэм зэ­Iэпах. Тырныауз къалэм дэт лицей №1-м хэту мэлажьэ Отаров Керим и цIэр зезыхьэ музей. Абы щахъумэ усакIуэм и сурэтхэр, дунейм къытехьа и япэ тхылъхэр, къыщIэна хьэп­шыпхэр.
Дунейпсо классикэ тхыгъэ нэхъыфIхэр Отаровым балъкъэрыбзэкIэ зэридзэкIащ. Отаров Керим и усэхэмрэ и псалъэхэр зыщIэлъ уэрэдхэмрэ балъкъэрыбзэкIэ, ады­гэб­зэкIэ, урысыбзэкIэ, тыркубзэкIэ, тыркумэныбзэкIэ, ин­джылызыбзэкIэ зэрадзэ­кIауэ ягъэзащIэ. УсакIуэм и тхыгъэхэр зэрадзэкIащ Липкин Семён, Голубков Дмит­рий, Яропольский Георгий, Латынин Валерэ, Скодтаев Эльбрус, Накостоев Хаваш, Мизиев Къанщобий сымэ. 
УсакIуэм и зэфIэкIымрэ лъа­гъуныгъэмрэ тыхь зыхуи­щIа цIыхубэм ар зэрызыщамыгъэгъупщэр гуапэщ. ­Балъкъэр литературэм хэлъ­хьэ­ныгъэфI хуэзыщIа уса­кIуэш­хуэр куэд щI­ауэ къыт­­хэ­мытыжми (1974 гъэм дунейм ехыжащ) абы и IэдакъэщIэкI цIыхубэм зэIэпаххэр щыхьэт тохъуэ а усакIуэр зэрыуа­хъ­тыншэм.
Къэпсэлъа хьэщIэхэм жа­Iар къызэщIэпкъуэжмэ, абыхэм къыхагъэщащ Отаровым и усэхэр фIыуэ зылъагъухэм я дежкIэ псом хуэмыдэу зэ­рылъапIэр ахэр хэку лъа­гъуныгъэкIэ зэрыгъэнщIар. Ап­хуэдэу Отаровым и Iэда-къэ къыщIэкIахэм къыщыгъэлъэгъуат къэралым и зыужьыныгъэр, гуащIэрып­сэухэм я лэ­жьыгъэ хьэлэлыр, щIыналъэм и дахагъэр. 
УсакIуэм и гъащIэмрэ и щIэинхэмрэ теухуа теплъэ­гъуэ­хэр пшыхьым къыщагъэлъэгъуащ, артистхэм ягъэзэщIащ Отаровым и ­псалъэхэр зыщIэлъ уэрэдхэр, и усэхэми пшыхьым къыщеджащ.
«Жизнь замечательных ­людей» серием хыхьэу пшы­хьым утыку къыщрахьа «Керим Отаров» тхылъым ихуащ Керим и гъащIэмрэ гуа­щIэмрэ теухуахэр, урысыбзэм кърагъэзэгъа и усэхэм, поэмэхэм, Iуэтэжхэм ящыщ.
Зэхыхьэр и щыхьэтщ уса­кIуэм республикэм и щэнхабзэмрэ литературэмрэ хуи­щIа хэлъхьэныгъэхэр цIы­ху­бэм зэращымыгъупщэм, ноби абыхэм щIэупщIэ зэраIэм, цIыхубэ усакIуэм и щIэинхэр хъумэным иджырей, къэкIуэну щIэблэхэм я дежкIэ мыхьэнэшхуэ зэриIэм. Зи усэхэр Урысейм, Азие Курытым щып­сэу лъэпкъхэм я бзэхэмкIэ зэрадзэкIа Отаровым и Iэдакъэ къыщIэкIахэм дяпэкIи лъэпкъхэр зэныбжьэгъугъэ быдэрэ мамырыгъэкIэ зэ­къуигъэувэну ди гуапэщ.
ТЕКIУЖЬ Заретэ. 
Сурэтыр Къарей Элинэ трихащ.