КъМР-ни Парламентинде «Ахшылыкъны тереги» битеуроссей жандауурлукъ жумушла бардырылгъандыла.   

Биринчилени санында акциягъа Парламентни башчысы Татьяна Егорова къатышханды. Бу жол ол республикалы газетлени бла журналланы «Радуга» реабилитация арагъа бла уллайгъанла тургъан энчи юйге саугъалагъанды.

Жазылгъандан сора, Татьяна Борисовна жандауурлукъ ишни магъанасыны  юсюнден айтханды журналистлеге. Ол акцияны чеклеринде республикалы газетлени бла журналланы сабийле тургъан интернатлагъа, уллайгъанла жашагъан энчи юйлеге бла СВО-гъа къатышханланы юйюрлерине болушургъа онг чыкъгъанына ыразылыгъын билдиргенди. 

–  Биз газетлеге болушхан бла бирге, къыйын жашау болумгъа тюшгенлеге жюрегибизни жылыуун беребиз. Басма органла, ол санда миллет тилледе чыкъгъанла, ана тилни сакъларгъа болушадыла, инсанланы окъургъа кёллендиредиле. Бюгюн а ол артыкъда магъаналыды, ол себепден акциягъа ыразылыкъда къатышабыз,-дегенди спикер.

Татьяна Борисовна республикалы газетлени сюйюп окъугъанын, миллет тилледе чыкъгъанланы ангыламай эсе да, алагъа да къарагъанын айтханды. Ол шёндюгю технологияла айныгъаны бла басма органлагъа женгил болмагъанын белгилегенди эмда жамауатны алагъа себеплик этерге, жазылыргъа, окъургъа чакъыргъанды.  «Мен а къагъытдан окъургъа сюеме газетни, китапны да. Аны къолгъа алгъан хычыуунду»,-дегенди спикер.

Бу акцияны юсюнден Парламентни депутаты, Искусстволаны Шимал-Кавказ къырал институтуну ректору Рахайланы Анатолий да айтханды. Ол «Кабардино-Балкарская правда», «Заман» эм «Адыгэ псалъэ»  газетлени юйюне жаздыргъан бла бирге, аланы вузда да алгъанын белгилегенди.

- Ана тилин билмеген, сакъламагъан халкъ тюйюлдю.  Республикалы газетле къабарты, таулу, орус халкъланы тарыхлары бла къаты байламлыдыла, ала ёмюрден артыкъ заманны ичинде миллет бла бирге келедиле. Битеу билдириулени, жангылыкъланы, халкъларыбызны жашауларыны юслеринден да биз аладан билебиз. Ала миллетлерибизни сакълайдыла, окъургъа, ана тилде сёлеширге кёллендиредиле, - дегенди ол.

Депутат, Россейни сыйлы тренери Амир Ахметов а «Ахшылыкъны тереги» социал магъаналы болгъанын, ол сабийлеге, къыйын жашау болумгъа тюшген инсанлагъа  болушлукъгъа бурулгъанын чертгенди. 

 «Ахшылыкъны тереги» акциягъа депутатла экинчи кере къатышадыла. Быйыл  анга он жыл толгъанын айтырчады. Аны чеклеринде къыралны битеу регионларында да басма органлагъа жаздырылып, аланы  сабийлеге, социал учреждениялада тургъанлагъа, къыйын жашау болумгъа тюшгенлеге саугъаларгъа боллукъдула. 

Токъланы Фатима.