Кёп болмай Москвада,  Россей Федерацияны Табийгъат байлыкъла эмда экология министерствосу къурап, «Россейни сууу» деген битеуроссей акцияны эсеплерине жораланнган семинар ётгенди. Анга КъМР-ни табийгъат байлыкъла эмда экология министрини орунбасары  Валерий Гриневич да къатышханды. 

Семинарны кезиуюнде тюрлю-тюрлю тюбешиуле да  болгъандыла. Ахырында  быйыл кеслерин айырмалы кёргюзтген регионла белгиленнгендиле. Алай бла, чыгъарылгъан эсеплеге кёре, Къабарты-Малкъар ючюнчю жерге тийишли болгъанды. 

Къабарты-Малкъарда «Россейни суулары» деген экология акция 2014 жылда апрельден башлап октябрьге дери ётеди. Быйыл аны чеклеринде 400 акция бардырылгъанды.  Ол санда черек жагъаланы 1141,66  километри  зыбыр къалгъан-къулгъанладан бла кир-кипчикден тазаланнгандыла. Акциягъа 240 мингден аслам адам къатышханды. 

Саулай алып айтханда, «Россейни суулары» къудуретни, суу байлыкъларыбызны сакълау бла чекленип къалмайды, жаш тёлюню экологиягъа сакъ болургъа юйретиуге да уллу къошумчулукъ этеди. Аны бла бирге акция хар адамгъа да кеси сюйген жерни тазаларгъа онг береди. Андан сора да, тёгерек айбат болгъанын, къыралны суу байлыгъын кёрюрге эм аны келир тёлюлеге сакъларгъа кереклисин жамауатха эсгертеди.

-Уллу кёллю болмай, республиканы суу объектлерини болумларын игилендириуге къошумчулукъ этгенлеге  ыразылыгъымы билдирирге сюеме. Быллай огъурлу ишде хар адам да бек  магъаналыды.   Бирсилеге юлгю кёргюзтген лекцияла окъугъандан, кинола кёргюзтгенден, презентацияла бардыргъандан эсе кёп да хайырлыды,- дейди КъМР-ни табийгъат байлыкъла эмда экология министри Шауаланы Илияс. 

Эсге сала айтсакъ, быйыл регионлада акциягъа  1,3 миллион волонтёр къатышхандыла. Аланы  себепликлери  бла черек  жагъаланы 47 минг километрин  тазаларгъа къолдан келгенди. Ол былтырдан иги да кёп болгъанын да  белгилерчады. 

Магометланы Сулейман.