Хасанияны Маданият юйюнде быйыл элни айныууну эсеплерине аталып къууанчлы жыйылыу болгъанды. Аны устаз Уяналаны Назиля бла элли жаш Нурлан Джамалдинов бардыргъандыла. Ала бек алгъа Хасаниядан «Минги-Тау» тепсеу къауум бу кюнледе къыралны ара шахарында конкурсха къатышып, жетишимли болгъанын, «Басият» той-оюн къауум да элни дайым атын айтдырып келгенин белгилеп, аланы башчылары Хаджиланы Мадинаны бла Жаболаны Анжеланы сахнагъа чакъыргъандыла. Аланы алгъышларгъа уа элни башчысы Азаматланы Къайсын чыкъгъанды эмда алагъа  администрацияны атындан грамотала бергенди.

Андан сора элде быйыл тамамланылгъан ишлени юслеринден айтылгъанды. Аланы араларында бек магъаналыла быладыла: Аттоланы Салих атлы ара орамда Уллу Ата журт урушда Хорламны 80-жыллыгъына балли терекле орнатылгъандыла; эллилени  къыйынлары бла Летняя, Киевская, Брестская, Титов, Ульбашев, Совхозная орамла тапландырылгъандыла; КъМР-ни Спорт министерствосуну эмда Нальчик шахарны администрациясыны себепликлери эмда эллилени къатышыулары  бла да спорт комплекс ишлене турады. 

Хасанияда жашагъанла энчи аскер операциягъа къатышханлагъа, къазауат баргъан жерлеге да болушлукъгъа юлюшлерин дайым къошадыла. Алай бла эки миллион сомгъа  гуманитар жюк жыйышдырып ашыргъандыла. Ол жандауурлукъгъа элде тиширыуланы биригиую, почта бёлюмде ишлегенле да уллу къыйын салгъанлары энчи белгиленнгенди.

Быйыл жайда хасаниячыланы къыйынлары бла хычинни бек уллу байрамы къуралыулу ётгени бла эллиле ёхтемленирге боллукъларыны юсюнден да айтылгъанды. Байрамгъа, Ич ишле министерствону билдириуюне кёре, 25 минг адам къатышханды.
Келир заманда тамамланыллыкъ ишлени къаууму да туура этилгенди. Алайды да, алгъаракълада элде кир суула баргъан ызла балансха алыннгандыла. Алагъа энди ремонт этерге керек болса, ол ишни Нальчикни «Водоканалы» бардырлыкъды. Дагъыда 2026 жылда элде Киевская, Летняя, Брестская орамлагъа тынгылы ремонт этиу планнга киргенди. Элни администрациясыны башчысы Азаматланы Къайсын, жыйылгъанланы келе тургъан Жангы жыл бла алгъышлай, элде тамамланылыргъа керекли кёп жумушла болгъанларын айтып, ала къысха заманны ичинде  къолгъа алынырыкъларына ышандыргъанды.

Къууанчлы ингирде Мусукаланы Руслан, Холамханланы Къайсын, элде искусстволаны школунда  жырларгъа юйреннген Нурлан Джамалдинов, Джейрон, Байсолтанланы Инара, «Минги-Тау» къауум жырлап, тепсеп да келгенлеге зауукълукъ тапдыргъандыла. Анга уа аланы къызыу къарслары шагъатлыкъ этгендиле. 

Холаланы Марзият.