Бедикни орта школунда энчи аскер операцияда жан берген Бийчеккуланы Аскерни жашы Азаматны эсгергендиле. «Жигитни партасы» деген проектге кёре къуралгъан тюбешиуге аскерчини жууукълары, устазлары, Элбрус районну билим бериу управлениясыны таматасы Атаккуланы Нюржан, баш специалисти Ахкёбекланы Жанна, жаш тёлю политика бёлюмюню башчысы Атмырзаланы Алиса, афган урушну ветеранларыны  советини таматасы Князланы Алим эм башхала келген эдиле. 
Бийчеккуланы Азамат эл школну 2020 жылда бошап, аскерге кетеди.  Анда къуллугъуну болжалы ахырына жетгенде уа, контракт жазып, аскерде къалады. 2022 жылда СВО башланнганда уа, чынтты эр кишича, Ата журтун къорууларгъа атланады. Жарсыугъа, быйыл жазда, энчи борчну толтургъан кезиуде,  Азаматны жашауу юзюлгенди. 8 ноябрьде аны туугъан кюню эди. Алай ол ёмюрлеге да 22-жыллыкълай къаллыкъды...
«Жигитни партасын» ачаргъа уа аскерчини устазлары сюйгендиле.  Азаматны таныгъанла  аны  кёп ариу сёзле бла  эсгергендиле. Школчула уа жигитликни юсюнден назмула айтхандыла.