Биз Эл-Тюбюне  баргъаныбызда, кюн жарытып эди Къулийланы Къайсынны элин. «Мында туугъан хар инсан да поэт болургъа керекди. Къара бу ариулукъгъа!» - деген эдик ол кюн, бийик, ёхтем таулагъа къарай, хауаны тазалыгъына сейир эте. Кереметланы (Мушкаланы) Мариямны юйюнде уллу къууанч болуп тургъанлай, кирип барабыз: кичи жашы Зафир СВО-дан отпускга келип тура эди.

Биринчи сейир этгенибиз: Зафир бла бирге келген киштик. «Гитче кишиучюклей алгъанма да, анда алай ёсдюргенме», - дейди Зафир. Ол Донецк ызда да машина жюрютеди. «Кёп затха башха тюрлю къарап башлагъандыла жашла, - дейди аналары Мариям. - Гыржынны атаргъа къоймайдыла. Уруш къаты баргъан кезиуде солдатлагъа ашны жетдиралмайдыла кезиуюнде. Сейир этген эдим: жайда келгенлеринде, бахчада сенгирчкелени тауушлары окъуна сагъайта эдиле жашланы. Мени акъылама кёре, хар СВО-дан къайтхан жашха реабилитация керек боллукъду. Биз ангыламайбыз толусунлай аланы жюклерин, жууаплылыкъларын да. Манга бирле ачыкъ: «Жашларынг ахча ишлерге кетгендиле», - дейдиле. Биринчиден, экисини да СВО-гъа дери контрактлары бар эдиле, бу операция бошалгъынчы, ала андан чыгъаллыкъ тюйюлдюле. Экинчиден, СВО-гъа къатышханла бизни къыралыбызны сейирлерин къоруулайдыла. Жер башында хар къыралны да аскерчилери барды. Биз Россейде жашай эсек, кесибизни къыралыбыз ючюн сюелирге керекбиз. Биреу артха турса да, башха уа алгъа атларыкъды».

Ана жюрек… Ненча кечени чыкъгъанды тангнга жукъусуз Мариям? Ненча кере жилягъанды, балаларына къоркъуп? Аны жаланда кеси биледи. Бюгюнлюкде Мариямча аналаны, аны жигит жашлары Зафир бла Зарифни, башха СВО-гъа къатышхан адамларыбызны  битеу жамауат къол аязында тутаргъа керекди. Бизни кёбюбюз битеудуния политикада не затла бола тургъанларын толусунлай ангыламайбыз. Аны бла бирге къырал кесини аскерчилерине алгъа атларгъа буйрукъ берсе, аланы артха турургъа эркинликлери жокъду. Аскерчилени тенглери, жууукълары, сора аскер бла байламлы болмагъан адамла да: «Жашла отха киргенде, бир жанында къалай турайыкъ?» - деп, контракт этедиле. Бюгюнлюкде бир бирге къаты сёлешмей, ариу айтыргъа керекбиз.

«Тамата жаш бусагъатда Запорожье ызда машина жюрютеди, артиллеристди. Ол отпускга келгенинде, юйдегили болгъан эди, Таймия да туугъанды. Туудукъчугъум дунияны жарытханды, жюреклерибизни да жапсарады. Анга дери мен кёбюрек  жиляй эдим. Баям, Аллах бошуна бир  жанны да жарата болмаз. Кече уянып, соцсетьледе жашла не заманда болгъанларына къарайма.  Кимден да бек мамыр жашауну аскерчиле бла аланы юйюрлери сакълайдыла!»- дейди Мариям.

Кереметланы жашил, ариу, эркин юйлери тюз тауну этегинде орналыпды, эл да къол аяздача кёрюнеди алайдан. Сабийлеге хычинле  бла локъумла биширип, таулагъа  къарап, зауукълу жашарча мында онгла бардыла. Тамата Зариф бла аны кичиси Зафир аскерни сайлагъанлары бошдан болмагъанды. Аталары  погранзаставада машина жюрютюп тургъанды. Врачланы халатлары ючюн аурууу кюч алып, аякълары гангрена болгъан эдиле. Жууукъла болушуп, Москвагъа да элтген эдиле, алай операция болушмагъанды. Алай бла, жашла ёксюз къалгъандыла. Баям, ала теркирек аягъы юслерине турургъа сюе болур эдиле. Аланы ангыларгъа боллукъду. Къарындашла Булунгуда  орта школну бошап, Москвада юридический университетде бийик билим алгъандыла. Контракт этгенлеринден сора, Владикавказда артиллерия  дивизионда машинала жюрютюп тургъандыла. СВО башланнганда, тамата жашны стажы юч жыл эди, кичини уа - бир жыл.

«Адам шашып къаллыкъды, шёндюгю жашауну жюгюн кётюралмай, - дейди Мариям. - Манга намазым бек болушады. Жаланда жашла ючюн угъай, барыбыз ючюн да этеме тилек. Юйден чыгъып, чыпчыкълагъа аш - суу береме, хар жаны болгъан  тынч жашаса сюеме. Чыпчыкълагъа къарай, къууанама.  «Бизни жашлагъа да бир болушлукъ чыкъсын, барысы да юйлерине хорлам бла саулай къайтсынла», - дейме. Алгъышла этейик барыбыз да, тилекле этейик», - дейди Мариям. Ариу ана. Кёп затны сынагъан жаш ана. Юйю да - таза, ниети да - таза.  

Байсыланы Марзият.