Нальчикде Республикалы больницаны кардиология бёлюмюню врачы Моллаланы Джамиля жюреклери ауругъан саусузланы багъады.

Ол кеси Тырныауузданды. Анда Орта школну бошагъандан сора, 2017 жылда Москвада Сеченов атлы медицина университетни тауусады. Андан сора анда Бакулев атлы жюрек, къан тамырла арада ординатурасын, ызы бла аспирантурасын бошайды.

Бизни  бла ушагъында ол былай дейди:

–   Алгъадан да доктор болургъа муратым бар эди. Жашау жолума башха усталыкъ сайларма деген акъыл бир заманда да келмегенди. Адамлагъа  болушургъа сюйгенме. Атам, анам да ыразы эдиле бу усталыкъны сайлагъаныма. Аланы хайырындан къыралыбызны медицина университетледен биринде окъугъанма.

Ишлеп тёртюнчю курсда окъугъанда окъуна башлагъан эдим, медсестра болуп Бакулев атлы  арада. Ол заманнга саулукъ сакълауну, жюрек ауруулагъа къарагъан бёлюмюн сайлагъан эдим. Он жылны окъугъан да, окъуй тургъанлай ишлеген да этдим. Жашау жолума бу усталыкъны сайлагъаныма  бир да сокъуранмадым. Битеу дуниягъа атлары айтылгъан алимле Бокерия Л.А., Глухова Е.З., Куц Э.В.  бла бирге ишлеп тургъаныма къадарыма ыразыма.

Жаш специалистге атлары айтылгъан уллу врачланы биргелерине ишлеген алай тынч тюйюлдю.  Кесин коллективге келишдирирге да керекди. Ол а тёгерегингде ишлегенле кимле, къаллай адамла болгъанлары бла да байламлыды. Аны юсюнден Джамиля бла ушагъыбызда ол былай дегенди:

– Окъууну бошагъандан сора уллу билимлери, сынамлары болгъан профессионалла бла ишлеп тебиреген эдим. Бакулев арада  саулукъ сакълауда атлары айтылгъан врачла Наида  Булаева, Давид Мрикаев, Виолетта  Джанкетова,  Татьяна  Машина, Мелано Гелашвили кеслерине  нёгер этдиле.

Аллай белгили адамла бла ишлей, таулу къыз да ишин базыныулу бардырады. Ангыламагъан  соруулары  болса, башында сагъынылгъан коллегаларына сорады. Алай бла аз-аздан сынам  ала  тебирейди.

Сегиз жыл ишлегенди Джамиля   белгили Бакулев атлы жюрек-къан тамырла арада. Бюгюнлюкде   Нальчикде Республикалы больницада саулукъларына тарыгъып келгенлени  тынгылы тинтеди.

- Эки адам бирча аурусала окъуна, бир дарман экисине да бирча келишмейди,-дейди Джамиля.  - Аны ючюн хар  ауругъанны санына-чархына келишген  дарманны тохташдырыргъа керекди. Багъыуну уа андан сора башларгъа.

Шёндю интернетде дуния бла бир билдириу барды. Дарманланы махтайдыла, ол сау этмеген  ауруу жокъду, деп. Врач айтханнга кёре, ауругъан адам чынг аллын  докторгъа жолугъургъа керекди. Тарыгъыуларын айтып, аурууун тюз тохташдырыргъа, жаланда андан сора башларгъа багъыуну. Белгилегенибизча, Республикалы больницада ишлегенли алай кёп да болмайды,  алай аны уста врач болгъаны айтылып тебирегенди. Ол бакъгъан саусузладан бири Бабугентден Гыдайланы Ибрагим былай дейди: «Къауум жыл жюрегим ауруп бек къыйналып тургъанма. Дарман ичмеген кюнюм жокъ эди. Бир-бирде уа юч-тёрт тюрлюсюн окъуна.  Республикадан тышында врачлагъа барып да тургъанма. Бир тюрлю себеплик болмады. Ишни да къоюп юйде тохтадым. Бир кезиуде жууугъум айтып, Джамилягъа бардым. Ол манга тынгылады хар сёзюмю къулакъгъа салып. Сора анализлерими алды,  кюзгюге салды,кардиограмма этдирди. Андан сора багъып тебиреди.

Ауругъан кезиуюмде кёп докторлагъа жолугъа тургъанма. Джамиля тынгылай да биледи, сора аурууну юсюнден айтып ангылатхан да этеди. Ол бакъгъанлы бери Аллахымы таныдым. Энди ауруудан къоркъуп юйге кирип турмайма. Ишге да чыкъгъанма. Жюрегимде болгъанны айтайым: «Джамиляны сёзю да дарманды. Аллайлагъа айтадыла, адам кеси жеринде» деп.

Ушагъыбызны ахырында доктор къайтарып дагъыда  айтады врач буюрмагъан дарманны ичмегиз, аны ахыры иги бла бошаллыкъ тюйюлдю, деп. Андан да игиси уа, адам кеси сакъларгъа керекди саулугъун. Бек алгъа ашына-суууна къараргъа, къара ишде да уруна турургъа. Ичгиден кесин тыяргъа, тюз жашау бардырыргъа. Къыйнагъан  жери болгъанлай, созуп турмай, алгъадан врачха барыргъа.

 Ауруула  кёп, ауругъанла андан да кёп. Ала хар бири да докторлагъа себеплик излей барадыла. Джамиляча врачлагъа тюбеселе уа, саулукъларына себеплик болуп, къарыу-кюч алып, кёллери кётюрюлюп къайтадыла.
Джамиляны юйюр жашаууну юсюнден айтханда, аны баш иеси Аппайланы Расулду. Ол да врачды. Бир къызчыкълары барды. 

Османланы Хыйса.