Къабарты-Малкъарда «Муратланы назысы» битеуроссей жандауурлукъ акция башланнганды. Аны Къабарты-Малкъарны Башчысы Казбек Коков ачханды. Анга толтуруучу эм законла чыгъарыучу власть органланы, министерстволаны бла ведомстволаны келечилери, бизнесменле эм башхала да къатышадыла.

Хар замандача, «Биринчилени атламлары» биригиуню регион бёлюмюню келечилери социал учреждениялада тургъан,  саулукълары бла байламлы чекленнген онглары болгъан, ёксюз, къыйын болумгъа тюшген юйюрледен сабийлени муратларын жыйып, жазып алып, конвертлеге салып, Назыгъа  такъгъандыла.

Кёп болмай тёрели акциягъа коллегалары бла  бирге КъМР-ни саулукъ сакълау министри Рустам Калибатов да къатышханды. Аны бла байламлы министрден башлап республиканы муниципалитетлерини медицина организацияларыны таматаларына  Жангы жылны аллында сабийлени жюз бла жыйырма тилеклерин толтурургъа  борч алгъандыла.

Эсге сала айтсакъ, жыл сайын жандауурлукъгъа медицина бёлюмню келечилери тири къатышадыла эм бирсилеге юлгю болурчадыла.

Курданланы Сулейман.