КъМР-ни Правительствосуну юйюнде ётген кенгешде юч жанлы комиссияны келечилери бизни республикада социал-урунуу халланы тийишдириуню юсюнден сёлешген эдиле. Аны эсеплерине кёре,  жангы келишим этилликди, уруннган адамлагъа берилген социал гарантияла уа асламыракъ боллукъдула.

Сюзюуге эки эм магъаналы документ чыгъарылгъан эди. Биринчиси Правительствону, профсоюзланы биригиуюню эмда иш бериучюлени арасында къураллыкъ юч жанлы келишимни проектиди. Экинчиси уа 2026-2029 жыллагъа иш хакъны эм  аз ёлчемин тохташдырыу бла байламлы эди. Комиссияны жууаплы секретары, КъМР-ни урунуу эмда социал къоруулау министрини орунбасары Анатолий Шетов бу темалагъа сейирлери болгъан хар кимни да оюмларын туура этгенди. Ушакъны кезиуюнде, уруннган адамланы болумларын не аз да осал этерик оноуладан чыртда кери турургъа келишгендиле. Хар нени да сюзгенден сора, жаланда шёндюгю низамланы сакълау бла чекленип къалмай, къолайлыкъны эмда урунуу болумланы игилендириу жаны бла талай жангы борчну да къабыл этгендиле.

Алай бла,  энди жангыртылгъан келишимде, биринчи разряды болгъан ишчини ставкасы кезиу-кезиу кёбейтилип барыллыгъы тохташдырылады. Ол кеси да федерал МРОТ-дан аз болмазча себеплик этерге оноулашхандыла. Андан сора да,  иш хакъны ичинде эм азындан 74 процентин тариф ставка алырча амал табаргъа боллугъун белгилегендиле.

Анатолий Шетов жаш кадрлагъа билеклик этиуге да эс бургъанды. Ол белгилегенича, ишге орналгъан аллай специалистлеге насийхатлыкъ система кийирилликди. Аны уа организацияда эм азындан он жыл уруннган адамла этерикдиле. Аланы да ол къыйынларын, окладларына эм азындан онбеш процент къошуп, ахча бла къайтарлыкъдыла.

Алайды да, ачыкъ ушакъны кезиуюнде республикада социал партнёрлукъ деген иги да кючлю болгъанды. Кенгешде этилген оноула уруннган адамланы къолайлыкъларын игилендирирге, ишге уста кадрланы чакъырыргъа да болушурукъдула. Жыйылыуну эсеплерине кёре сагъынылгъан келишимни ахыргъы проектлери жарашдырыллыкъдыла.

Улбашланы Мурат.