Налшык къалэм дэт, ЩIалэгъуалэм я унэм иджыблагъэ щагъэлъэпIащ дунейпсо утыкухэм республикэм и щIыхьыр лъагэу щызыIэта спортсменхэмрэ КъБР-м ЩIалэгъуалэм я IуэхухэмкIэ и министерствэм къыхилъхьа жэрдэмхэм къыщыхэжа­ныкIахэмрэ.

ГуфIэгъуэ зэхуэсым хэтащ КъБР-м и ­Парламентым и УнафэщIым и къуэдзэ, Олимп джэгухэм я чемпион Къардэн Мурат, КъБР-м и Парламентым и комитетым и уна­фэщI Емуз Нинэ, Парламентым и депутат Ахъмэт Амир, КъБР-м и министрхэу Хьэса­нэ Ислъам, Лу Азэмэт, Бозий Аскэр сымэ, спорт­смен цIэрыIуэхэр, тренерхэр, спортым и ветеранхэр, жылагъуэ зэгухьэныгъэхэм я лIыкIуэхэр.
ЗэIущIэм щагъэлъэпIащ Японием и къа­лащхьэ Токио тхэквондомкIэ щекIуэкIа Сурдлимп джэгухэм (тэмэму зэхэзымых спорт­сменхэм я зэхьэзэхуэ) Урысей Федерацэм щыяпэу дыщэ медаль къыщызыхьа Сатушы Мадинэрэ абы дэлажьэ, УФ-м щIыхь зиIэ и тренер Ахъмэт Амиррэ. Къэпсэлъахэм къыхагъэщащ апхуэдэ ехъулIэныгъэ зыIэрыбгъэхьэн щхьэкIэ, къару лъэщрэ зэфIэкIыфI­-рэ спортсменым бгъэдэлъын зэрыхуейр икIи Мадинэ ахэр къызэрыкъуэкIар, республикэм и щIыхьри дунейпсо утыкум лъагэу зэриIэтар. 
КъБР-м ЩIалэгъуалэм я IуэхухэмкIэ и министерствэм и нэIэ щIэту лажьэ «Сэ сытренерщ», «КъэкIуэнум и джэгухэр», «ЛIыхъужь­хэм я лигэ», «Районхэм я зэхэуэ», «Чемпионхэм я гъуэгуанэ» спорт-егъэджэныгъэ пэхуэ­щIэхэм къыщыхэжаныкIахэми щехъуэхъуащ а пщыхьэщхьэм. 
КЪУЭЖЕЙ  Iэмин.