9 декабрьде бизни къыралда Ата журтну Жигитлерини кюнюн белгилегендиле. Ата журтубузну не къыйын заманында да  бир къоркъуудан артха турмагъан, къыраллары ючюн жанларын аямагъан Жигитлени эсгере, аланы хурметлегендиле. Элбрус районда да бу кюн тийишли белгиленнгенди. Школланы окъуучулары бла маданият ишчиле тюбешиуле бла магъаналы дерсле къурагъандыла.

Элбрус элни Маданият юйюнде Ата журтну къоруулаучусуну жылыны къууанчлы халда жабылыуу болгъанды. Анга районну къуллукъчулары бла билим бериу учрежденияланы келечилери къатышхандыла. Аны Жигитлени кюнюнде бардыргъанлары бошдан болмагъанды. 

Байрам Россейни бла Уллу Хорламны байракъларын чыгъарыу бла башланнганды. Уллу Ата журт урушну заманында элден къазауатха кетген, анда атларын айтдыргъан жашланы эсгере, ол жыллада ала болдургъан жигитлик бир заманда да унутулмазлыгъын, тёлюледен тёлюлеге ёте, сакъланырыгъын белгилегендиле. Аллай батырла бюгюннгю кюнледе да бардыла. 

Санкт-Петербургну Правительствосуну тыш байламлыкъла жаны бла комитетини М.М.Бобров атлы эсде къаллыкъ майдаллары бла РФ-ни МЧС-ини Элбрус излеу-къутхарыу отрядын, Излеу къымылдауну алчыларын саугъалагъандыла. «Оборонная тропа»  патриот экспедицияны 20-жыллыгъына аталгъан эсде къаллыкъ майдалла бла  «Мемориал Эльбрус» излеу къаууму, Элбрус элни Маданият юйю, бир къауум устаз, «Чегет» канат жолланы къуллукъчулары, «Терехов» деген таучуланы хазырлагъан араны аскерчилери да саугъаланнгандыла.

Эсгериу тюбешиуню ахырында жыйылгъанла Уллу Ата журт урушда жоюлгъан Жигитлени эсгертмесине гюлле салгъандыла. 

Кёнделенни Доттуланы Ахмат атлы 1-чи номерли мектебини окъуучулары да, бу кюнню белгилей, «Урушда жоюлгъан 800 аскерчи» деген  эсгериу тюбешиуню тышында  бардыргъандыла. 

Назмула бла жырла айта, Россейни къоруулагъан жигитлеге уллу хурмет этгенлерин билдиргендиле.Уллу Ата журт урушха Кёнделенден 1500 жаш кетгенди. Аладан 800 къайтмагъандыла. Ала журтларын къоруулай жан бергендиле. Аланы жигитликлери эллилени абаданларыны болсун, жашларыны болсун, эслеринде къаллыкъларын айта, ол жигитле бла ёхтемлене, аланы юлгюлери бла ёсе келгенлерин чертгендиле.

Тырныауузну окъуучулары бла студентлери устазларыны биргелерине «Жигитни орамы»  Битеуроссей акциягъа къатышхандыла. Совет Союзну Жигити Михаил Кириллович Рогачёв  атлы орамда жыйылып, Ата журтну Жигитлерин  хурметлегендиле. Россейни тарыхында бола келген урушлагъа къатышхан жерлешлерибизни эсгергендиле. Аланы атларын бла жигитликлерин поэтле ариу назмулагъа салып, ёмюрлюк этгенлерин да айтхандыла. Назмула окъуп, патриот жырла айтып, ол жигитликни юлгюсю бла жюреклеринде патриот сезимни кючлей, Ата журтларына сюймекликде ёсгенлерин шагъатлагъандыла.

Отарланы Омар атлы район краевед музейде «Къабарты-Малкъарны алтын жулдузлары» ат бла кишиликни дерси ётгенди. Аны музейни бла районну Маданият управлениясыны ишчилери бирге хазырлагъандыла.Къонакъланы араларында Юнармия къауум, аланы устазлары, Афган урушну ветеранлары Князланы Алим бла Жашууланы Илияс, энчи аскер операциягъа къатышханла Батай Шамурзаев,   Азамат Балуев бла Владимир Коваль болгъандыла. Элбрус районну жер-жерли администрациясыны башчысыны биринчи орунбасары Толгъурланы Расул бла районну Маданият управлениясыны таматасы Толгъурланы Жаннет эм администрацияны бла Маданият юйню келечилери болгъандыла. Кишиликни дерсин Ёзденланы Танзиля бардыргъанды. Ол Россейни тарыхында бола келген урушланы эсгере, алагъа къатышхан жерлешлерибизни жигитликлерини, аскер жолларыны юсюнден айтханды. Аланы къыралыбызны мамыр жашауу ючюн жан бергенлери районну жамауатны эсинден бир заманда да кетмезлигин чертгенди. Совет Союзну Жигитлерини жашау жоллары бла къонакъланы шагъырей эте, бизни ёхтемлигибиз болгъанларын энчи белгилегенди. 

Толгъурланы Расул,не заманда да батырлыкълары бла, ётгюрлюклери бла да айырмалы болгъан жерлешлерибизни хурметлей, бусагъатда бардырылгъан энчи аскер операцияны да хорлам бла бошаллыгъына ишексиз болгъанын айтханды. Юлгюле келтире, жаш тёлюге да аланы  жоллары бла барыргъа насийхат этгенди. 

Башха сёлешгенлени араларында Владимир Коваль  энчи аскер операцияда бизни жашла батырлача сермешгенлерин, алларына салыннган борчну толтуруудан артха турмагъанларын энчи чертип, ала бла ёхтемленнгенин айтханды. Къыраллары ючюн, бизни мамыр жашауубуз ючюн жан бергенлерин эм аланы атлары Россейни тарыхында алтын харфла бла жазыллыгъын айтханды. 

Къыралыбыз  мамыр жашауубуз ючюн  жан бергенлеге уллу хурметин билдирип, аланы атлары Россейни тарыхында алтын харфла бла жазыллыгъын да айтханды. Кеси да энчи операциягъа биринчи кюнюнден бери къатышханын, эм тамбла биягъы жолгъа атланырыгъын да билдиргенди. Районну артистлери да патриот жырлары бла жигитлик унутулмазлыгъына ийнандыргъандыла. 

Ата журтха сюймеклик, аны къоруулаугъа хазырлыкъ къайсы бирибизни да жюреклерибизде болгъаны шартды. Ата журтну Жигитлерини кюню ол унутулмазлыкъ  байрамды.  Аты эсде тургъан къадар, Жигит ёлюмсюздю.

Темуккуланы Асият.