Москвада  Россейни ФСБ-сыны директору А.Бортников  Терроризмге къажау миллет комитетни (НАК) бла Федерал оператив штабны (ФОШ)  жыйылыуларын бардыргъанды. Анда 2025 жылны эсеплери чыгъарылгъандыла эмда келир жылгъа борчла белгиленнгендиле, деп билдириледи НАК-ны сайтында.

Жыйылыуну башлай, А. Бортников быйыл украинлы спецслужбаланы эмда сауутланнган неонацист къауумланы пилотсуз системала бла трнаспортну бла отлукъ-энергетика комплексни объектлерине чабыууллукъ этиулери кёбейгенлерин эсгертгенди. Ол белгилегенича, Украина бла чекде тийрелеге  от ачыу, диверсантлы тасхачыланы къыралгъа кирирге кюрешгенлери тохтамайды. Запад спецслужбаланы юйретиулери бла чачдырылыучу эмда ууландырыучу затланы хайырланыуну амаллары да тюрлендириледиле.

Инсанларыбызны, артыкъда жаш адамларыбызны, аманлыкъ ишлеге къошар мурат бла кеслери жанларына тартыргъа кюрешгенле да кюч ала барадыла. Акъылбалыкъ болмагъанланы араларында террорчулукъ иш этген кезиуле бардыла. Халкъла аралы террорист организацияла Ара Азиядан иш излей кёчгенлени араларында радикал ниетлени алгъыннгы кюч бла жая барадыла.

А.Бортников быллай шартла да келтиргенди: кюч къурамланы бирге этгоен мадарларыны хайырындан быйыл 374 террорчулукъ ишни, ол санда 273 теракта болдурмазгъа къолдан келгенди. Бандитледен 24-сю ёлтюрюлгендиле, 2 мингден асламы тутулгъанды.  Террористлени жанларындан къоркъуу селеймеген Шимал Кавказда террористлеге къажау беш операцияны, 164 аскер эмда башха энчи мадарланы кезиулеринде 332 боевич эмда алагъа жакъ басханла жокъ этилгендиле.

Сауутланы законсуз сатыу бла кюрешген, ол санда СВО-дан келтирип да, 29 канал жабылгъанды. Аскер сауутланы игилендирген эмда тюрлендирген  113 жашырын мастерской ачыкъланнганды. Чачдырыучу затланы жашырыун сатыу бла кюрешген 87 аманлыкъчы къауумну жоллары кесилгенди. Кёчюрюлюучю ракета комплекслени эки жюзден артыгъы, боеприпасладан 147-ден асламы, штатда болгъан эмда къол бла ишленнген чачдырылыучу затладан минг бла жарымы сыйырылгъандыла.

 Росфинмониторингни себеплиги бла террорчулукъ ишлеге къатышхан беш минг бла жарым адамны  финансла бла байламлы операциялары, счётлары да «бузлатылгъандыла» - битеу да  битеу 490 миллион сомгъа.

Терроризмни, неонацизмни, башха радикал ниетлени жайыуну тыяр мурат бла Роскомнадзор, право низамны сакълаучу эмда надзор органла бардыргъан шёндюгю мадарланы хайырындан Интернетден террорчулукъгъа чакъырыулары бла 37 мингден аслам материалны алып кетерирге къолдан келгенди. Шёндюгю къоркъуула эсге алынып, бек магъаналы объектлени, бек алгъа транспорт инфраструктураны бла отлукъ-энергетика комплексни террорчулукъ ишледен сакълау жаны бла къошакъ мадарла этиледиле. Аны бла бирге терроризмге къажау кюрешни право мурдору да кенгертиледи.

Къыралыбызда,  аны жангы субъектлеринде да терроризмге, неонацизмге, башха радикал ниетлеге да къажау кюрешни амалларын бла мадарларын игилендириу власть органланы, саулай жамауатны да магъаналы борчлары болгъанлай къалады.

Федерал министерствола алагъа бойсуннган ведомстволаны бла башха организацияланы объектлерин террорчулукъдан къоруулау ишлерин игилендирирге борчлудула. Андан сора да, Правительствону 333-чю бегимини излемлерин толтурууну чеклеринде терроризмни ниетлери не къажау мадарланы комплекс планынжа белгиленнген ишлени барысында тамамларгъа керекдиле.

  Бизге шуёх кёзден къарагъан къыралланы келечилери бла бирге ишлеу да кючленеди. Ол санда  Терроризмге къажау кюреш бла байламлы халкъла аралы шартланы НАК-ны башламчылчыгъы бла къуралгъан тизмеси да бирге хайырланылады. Шёндюгю заманда Россейни терроризмге къажау кюрешде сынауу ШОС бла СНГ бардыргъан ишледе хайырын каёргюзтеди.

Жыйылыугъа къатышханла  душманны диверсия-террорчулукъ чабыууллукъларына къажау сюелир, ангылатыу ишни къыйматын кётюрюр ючюн  къырал власть органладан болумгъа кёре тюз мадарла этиу, болгъан тонглданы бютюн ъкыйматлы хайырланыу изленеди деп, аллай оюмгъа келгендиле эмда къошакъ мадарланы белгиленедиле.

Юсюпланы Галина хазырлагъанды.