Ата журтну Жигитлерини кюнюнде  РФ-ни Президенти Владимир Путин  Россейни Жигитлерине  «Алтын Жулдуз» майдалланы бергенди.

Анга аталгъан къууанчлы жыйылыу Уллу Кремль къалада ётгенди. Ары энчи батырлыкъ этген 200-ден аслам адам чакъырылгъанды. Аланы араларында Совет Союзну, Россей Федерацияны Жигитлери, Сыйлы Георгийни орденини кавалерлери, Кишиликни ордени бла юч эм андан да кёп кере саугъаланнганла болгъандыла.

Аланы алгъышлай, Владимир Путин былай чертгенди:  «Бюгюн, Ата журтну Жигитлерини кюнюнде, биз Россейни айтхылыкъ жашларына бла къызларына сый беребиз. Ала аскер жигитликлери эмда жигер урунуулары бла да Ата журтларына  къуллукъ этиуню юлгюсюн кёргюзтгендиле. Аланы атлары махтау бла айтылгъанлай турлукъдула».

Президент  ата-бабаларыбыз тюрлю-тюрлю тарых кезиуледе къыралыбызны бла халкъыбызны жалынчакъсызлыкъларын сакълар ючюн къалай къаты кюрешгенлерин эсгертгенди. «Къадарларына кеслери оноу этер, къырал кючлю болур, айныуну жолу бла андан ары барыр, келир заманнга таукел атлар ючюн, къолларындан келгенни аямагъандыла», - деп чертгенди.

-Шёндюгю къыйын заманда да биз аскер махтаулукъну тёрелери кючлене баргъанларына, бюгюннгю тёлю, ол санда жаш адамла, къазауатны ал сатырларында болгъан аскерчиле, ол тёрелеге кертичи болгъанларына энтта да бир кере тюшюннгенбиз. Ала бла ушакъларымдан ангылагъанма:  ата-бабалары бла байламлыкъларын, ала къойгъан хазнала сакъланыр ючюн жууаплылыкъларын да бютюн къаты сезгенлерин,- дегенди Президент.

Ол бюгюн Россейни Жигити деген атха тийишли болгъанла саугъаланганларын айтып, ала, энчи аскер операцияда аскер борчларын къыйын болумлада толтура, бийик усталыкъларын, ётгюрлюклерин, кишиликлерин, аскерчилени ызларындан элте билгенлерин, аскерлерибиз алгъа барыр ючюн, къолларындан келгенни аямагъанларын кёргюзтгенлерин чертип,  алагъа жюрек ыразылыгъын билдиргенди, «Сау болугъуз, керти къуллукъ этгенигиз ючюн!» - дегенди.

Сержант Никита Иванович Афанасьевге Россейни  Жигити деген ат ол ёлгенден сора аталгъанды. Аны аскерчини  юйюрюне бере, Президент: «Ёлген аскерчилерибизге ёмюрлюк махтау!» - дегенди.

-Бизни барыбызны да жигитлени алларында баш уруу, къыралыбыз, аны къадары ючюн жууаплы болуу, Ата журтха сюймеклик бирикдиреди. Бизни кючюбюз ма ол сюймекликдеди,  тарыхыбызны кертилигиндеди, - деп, Владимир Путин жыйылгъанланы барысын да байрам бла алгъышлагъанды.

Текуланы Хауа.