Къабарты-Малкъарда   «Коммунал инфраструктураны жангыртыу» федерал проектге кёре  2025-2027 жыллада ичер суу бла жалчытхан 36  объект жангыртыллыкъды. 

Ол санда РФ-ни Правительствосуну Председателени  Михаил Мишустинни буйругъу бла  Нальчикде баш водозаборну бла сууну тазалагъан станцияны игилендирирча мадар этилликди. Аны бла бирге  Тарчоков бла  Чернышевский атлы орамлада да суу быргъыланы алышырыкъдыла.

Андан сора да, Прохладныйде эки орамгъа  суу ызланы   игилендирликдиле. Басхан  районда да таза суу баргъан быргъыланы 79 километрден  40 километри тартылгъанды. Ол толу кючю  бла ишлеп башласа, Басхан шахар округну эм алты элни ичер суу бла  жалчытырыкъды. Эсге сала айтсакъ, алада 100 минг чакълы адам жашайды. 
Бюгюнлюкде Курпда насос станция ишлене турады. Ол жиберилсе,  Огъары Курп, Инаркой, Тёбен Курп эм Огъары Акъбаш эллени суу къытлыкъдан къутултурукъду.
Суу быргъыла  Хабазда, Кичибалыкъда,  Каменномостское, Аргудан, Урух, Янтарное, Красносельское, Карагач, Прималкинское, Терекское, Инаркой, Кахун, Морзох, Экинчи Чегем элледе эм Чегем шахарда да жангыртыллыкъдыла, башха объектле да ишленирикдиле.  
Саулай алып айтханда, юч жылны ичинде сагъынылгъан федерал проектни чеклеринде республикада 200 километрде суу  быргъыла тартыллыкъдыла эм суу жыйылгъан юч жер ишленирикди.  

Суу бла тынгылы жалчытыу иш быйыл башланнганды. Аны кезиуюнде 15 объект хазыр этилгенди. Келир жылда - 11 эм андан сора да 10-су  ишленирикдиле.
Этилген мадарланы хайыры бла республикада жашагъан иги кесек адамны жашау болумларын игилендирирге къолдан келгенди.

Магометланы Сулейман.