Заседание ФСБ

Урысейм Террорым пэщIэтынымкIэ и лъэпкъ комитетым и Iэтащхьэ, ФСБ-м и унафэщI Бортников А. и унафэм щIэту дыгъэгъазэм и 9-м Москва щызэхэтащ НАК-мрэ ФОШ-мрэ я лэжьыгъэхэм 2025 гъэм кърикIуахэр щызэхалъхьэжа, дызыхуэкIуэ илъэсым къапэщыт къалэн нэхъыщхьэхэр щаубзыхуа зэIущIэ, къет Террорым пэщIэтынымкIэ лъэпкъ комитетым и сайтым.

Зэхуэсым хэтащ комитетым щыщхэр, Урысей Федерацэм и прокурор нэхъыщхьэр, Урысей Федерацэм и Президентым и полномочнэ лIыкIуэу федеральнэ щIыналъэхэм щыIэхэр, къэрал властым и гъэзэщIакIуэ органхэм я унафэщIхэр, къулыкъущIапIэ хэхахэмрэ хабзэхъумэ IэнатIэхэмрэ я лIыкIуэхэр. ЗэIущIэр къыщызэIуихым Бортников А. къыхигъэщащ Украинэм и щэхурылажьэ IэнатIэхэм, IэщэкIэ зэщIэузэда неонацист зэгухьэныгъэхэм терроризмэм пыщIауэ ялэжь щIэпхъаджагъэхэр дызэрыт илъэсым хэпщIыкIыу нэхъыбэ зэрыхъуар, зезыгъакIуэр зэрымыс жьыхулъатэхэр къагъэсэбэпурэ гъуэгу, гъэсыныпхъэ-энергетикэ комплексхэм ахэр къебгъэрыкIуэну яужь зэритыр.

Зэпыуркъым Украинэм и гъунапкъэм пэгъунэгъуу щIыпIэхэм къеуэныр, ди къэралым щIэпхъаджащIэ-тIасхъэщIэх гупхэр къраутIыпщхьэну зэрыхэтыр.

КъуэкIыпIэм и щэхурылажьэ гуп хэхахэм я нэIэм щIэту зэрахъуэкI къагъауэ Iэмэпсымэхэр, цIыхум и узыншагъэм егуауэ щхъухьхэр къызэрагъэсэбэп Iэмалхэмрэ хабзэхэмрэ.

Нэхъыбэ хъуащ ди цIыхухэр зыхашэнымкIэ яIэ мурадхэри, псом хуэмыдэу абыкIэ яхуэлъэщ щIалэгъуалэм, ахэр щIэпхъаджагъэхэм хашэну хуейуэ, къыщыхъу щыIэщ терроризмэм пыщIа щIэпхъаджагъэхэр балигъ мыхъуахэм щрагъэлэжьи. Азие Курытым щыщу щылэжьэн мурадкIэ иджыри куэду къытхуэкIуэхэр къагъэсэбэпурэ, ди жылагъуэ зэхэтыкIэм къемызэгъ хабзэ мыхъумыщIэхэр ди цIыхубэм къыпхрагъэпщэн хьисэпкIэ дунейпсо террорист зэгухьэныгъэхэм ялэжь хьэгъэщагъэхэри нэхъ мащIэ хъуркъым. Къарузехьэ IэнатIэхэм зэгъусэу зэфIагъэкIа Iуэхухэм я фIыгъэкIэ дызэрыт илъэсым къызэпаудащ террорист щIэпхъаджагъэу 374-рэ, абыхэм ящыщу 273-р теракту, яукIащ щIэпхъаджащIэ 24-рэ, бзаджащIэрэ абыхэм я дэIэпыкъуэгъуу минитIым щIигъу яубыдащ. Терроризмэм пыщIа щIэпхъаджагъэ щалэжьынкIэ шынагъуэ мымащIэу иджыри здэщыIэ Кавказ Ищхъэрэм терроризмэм пэщIэту щызэфIагъэкIа Iуэхуитхум, дзэм, нэгъуэщI IэнатIэхэм ирагъэкIуэкIа I64-м къыщызэпаудащ бзаджащIэ 332-мрэ абыхэм я дэIэпыкъуэгъухэмрэ зэхащIыхьхэр. Iэщэ къызэрашэ гъуэгу 29-рэ зэхуащIащ, абы дзэ Iуэху хэхар щекIуэкI щIыпIэм ахэр къызэрырагъэIэпхъукIхэри яхэту. Iэщэр егъэфIэкIуэнымрэ абы езыхэр зыхуей зэхъуэкIыныгъэхэр хэлъхьэнымрэ хуэщIа лъэщапIэу II3-рэ зэхуащIащ. ЩIыпIэхэм зэратеуэ Iэщэхэр щэхуу зэбгрышыным пыщIа гуп зэщIэгъэуIуа 87-м я лэжьыгъэр къыщIагъэщри къызэпаудащ. Къытрахащ бгъэIэпхъуэ хъу ракетэ комплексхэу щитIым щIигъу, шэхэкIыу мини 147-м щIигъу, къагъауэ Iэмэпсымэхэм хуэдэу къэралхэм къыщыщIагъэкIами IэрыщIми минрэ ныкъуэм щIигъу.

Росфинмониторинг IуэхущIапIэм къызэригъэпэщурэ къызэпаудащ е къызэтрагъэувыIащ цIыху минитхурэ ныкъуэм щIигъум мылъку зэIэпахыныр, ахэр терроризм щIэпхъаджагъэхэм зэрыпыщIам къыхэкIыу. Псори зэхэту ар сом мелуан 490-рэ мэхъу. ЦIыхухэм хъыбар зэрырагъащIэхэр къагъэсэбэпурэ терроризмэм, неонацизмэм, нэгъуэщI Iуэху еплъыкIэ мыхъумыщIэхэм жылагъуэр къызэрыхураджэм щахъумэн мурадкIэ, Роскомнадзорымрэ хабзэхъумэ, кIэлъыплъакIуэ органхэмрэ и чэзум зэфIагъэкIа лэжьыгъэхэм япкъ иткIэ Интернетым ирагъэкIыжащ террористическэ купщIэ зыхэлъ тхыгъэ мин 37-м щIигъу.

Мы зэманым щыIэ шынагъуэхэр къэлъытауэ, нэхъри щIагъэхуабжьэ мыхьэнэшхуэ зиIэ IуэхущIапIэхэр, псом япэрауэ гъуэгу, транспорт-гъэсыныпхъэ IэнатIэхэм хыхьэхэр, терроризмэм пыщIа щIэпхъаджагъэхэм щыхъумэным хуэгъэза лэжьыгъэхэр, апхуэдэуи терроризмэм пэщIэтыным теухуа хабзэхэри зэманым къигъэувхэм хуэкIуэ ящI.

Къэрал властым и органхэм, зэрыщыту жылагъуэм я пащхьэ къит къалэн нэхъыщхьэ дыдэхэм ящыщщ терроризмэм, неонацизмэм, радикализмэм пыщIа идеологием пэщIэтыным хуэунэтIа Iэмалхэр егъэфIэкIуэныр, а лэжьыгъэхэр щызэтеухуауэ щытын хуейщ Урысей Федерацэм къыхыхьэжа щIыналъэщIэхэми.

Къэралым и министерствэхэмрэ а лэжьыгъэр зэхьэлIа IэнатIэхэмрэ щIагъэткIиен хуейщ ухуэныгъэхэр терроризмэм щыхъумэным хуэгъэза къалэнхэр, апхуэдэу Правительствэм и 333-нэ унафэм къыщыгъэлъэгъуахэр зэфIагъэкIыным и план зэгъэуIуам щыубзыхуахэр зэрагъэзащIэм кIэлъыплъыныр. Ди ныбжьэгъу къэралхэм яхудиIэ пыщIэныгъэхэри догъэбыдэ, абы терроризмэм пэщIэтыным теухуауэ НАК-м и жэрдэмкIэ къыхалъхьа, абы пыщIахэр къэгъэнэIуэным епха дунейпсо банкым иригъэкIуэкI лэжьыгъэри хэту.  Терроризмэм пэщIэтыным теухуауэ Урысейм иIэ зэфIэкIхэр мы зэманым ШОС-мрэ СНГ-мрэ хыхьэхэми ехъулIэныгъэкIэ къагъэсэбэп.

Зэхуэсым хэтахэм гулъытэ хэха хуащIащ, щыIэ хъуа щытыкIэм елъытауэ, бийм и тIасхъэщIэх-террористическэ ебгъэрыкIуэныгъэхэм зэрыхуэфэщэну пэщIэтын, профилактикэ икIи хъыбарегъащIэ-пропагандэ Iуэхухэр зэхэлъхьауэ гъэзэщIэн зэрыхуейр къэрал унафэр зехьэным хэт дэтхэнэ IуэхущIапIэми къызэрыщалъатыпхъэр.

ЗэIущIэм зыщытепсэлъыхьахэм ятеухуауэ къащтащ, иджырей щытыкIэм къызэригъэувым тету, терроризмэм къыпкърыкI шынагъуэм пэщIэтыным хуэунэтIа лэжьыгъэр нэхъри егъэфIэкIуэнымкIэ зэфIагъэкIынухэр, щыжеIэ Террорым пэщIэтынымкIэ лъэпкъ комитетым зэбгригъэха тхыгъэм.