Къабарты-Малкъарны эки турист объекти жыл сайын бардырылгъан «Россейни таулары» миллет премияда биринчиле болгъандыла.

Алай бла премияны «СКФО-ну эм иги тау лыжа курорту» деген бёлюмюнде «Эльбрус» курорт хорлагъанды, округну тау лыжа курортларында эм ахшы къонакъ юйюне уа Терс-Къолда «Rezidence» саналгъанды. Хорлагъанланы саугъалау къууанчлы халда Москвада болгъанды. «Кавказ.РФ» обществону генеральный директоруну орунбасары Николай Гончаровгъа бла къонакъ юйню генеральный директору Жангуланланы Исламгъа саугъаларын республиканы курортла эм туризм министрни Аскер Бифов бергенди.

Алгъышлау сёзюнде министр, Шимал Кавказ тауланы бла къонакъбайлыкъны жери болгъаны, мында Россейни эм бийик таулары бла шёндюгюлю излемлеге келишген курортлары орналгъанларын чертип, жыйылгъанлагъа жетишимле тежегенди. 

Эсгертиу: премия 24 бёлюмде бардырылгъанды, анда хорлагъанла онлайн халда къол кётюрюуню эсеплерине кёре сайланнгандыла, анга уа 380 мингден аслам адам къатышхандыла. Башламчылыкъны мураты Россейде тау лыжа туризмни айнытыуду, таулада тири солууну юсюнден аслам адамгъа билдириудю. Аны хайыры бла «Туризм эмда къонакъбайлыкъны индустриясы» миллет проектни тамамлаугъа да себеплик этиледи. Премияны Россейни Экономиканы айнытыу министерствосуну болушлугъу бла Тау лыжа индустрияны бла турист жерлени арасы къурайды.

Кульчаланы Зульфия.