Бу кюнледе Дагъыстанны Манас элини «Каспий» санаторийинде «Цифралы Кавказ» деген медиа къоркъуусузлукъну жалчытыугъа жораланнган форум бардырылгъанды. Аны коммерциялы болмагъан автоном биригиу «Жангы медиаланы айнытыуну институту» бла Дагъыстанны Билдириу эмда басма агентствосу къурагъандыла.  Форумну ишине Шимал-Кавказ федерал округну регионларындан журналистле, блогерле, жамауатчыла, къырал власть органланы келечилери эм экстремизмге бла терроризмге къажау кюрешни бардыргъан экспертле чакъырылгъан эдиле.

Эки кюнню ичинде бардырылгъан «тёгерек столлагъа», жыйылыулагъа эм панел сессиялагъа Къабарты-Малкъардан «Заман» газетни баш редактору Къонакъланы Хасан, ГКУ «КБР-Медианы» билдириу-аналитика бёлюмюню таматасы Аслан Закуреев эм Биринчи КъМР телеканалны информация службасыны баш редактору Алим Хостов къатышхандыла. 

Форумгъа жыйылгъанлагъа Дагъыстан Республиканы Билдириу эмда басма агентствосуну оноучусу Арсен Юсупов алгъыш сёз айтханды эм бюгюнлюкде информация технологияланы бла жалгъан интеллектни айныулары болмагъанча терк алгъа баргъаны себепли, бу жыйылыуну магъанасы да уллу болгъанын энчи чертгенди. Ол дагъыда  шёндю асламлы информация органлада ишлегенлени усталыкъларын тохтаусуз ёсдюрюп турургъа, ала ишлеринде хар затны да сюзюп, тинтип эм окъуучуларына «бишген» билдириулени берирге кереклисин айтханды.  Журналистлени бла блогерлени профессионал усталыкълары жамауатда къоркъуусузлукъну жалчытыугъа да себеплик этеригин чертгенди ол. 

Биринчи кюн танышыу тренингле болгъандыла, форумгъа къатышханла, бир-бирлерине соруула берип, жууапла алгъандыла. Андан сора сынау ишле башланнгандыла, журналистле къауумлагъа юлешинип, асламлы информация органлада болгъан магъаналы темаланы юсюнден жарашдыргъан пилот проектлерин кёргюзтгендиле. Ызы бла экспертле проектлени хазырлагъанла бла ушакъла бардыргъандыла эм оюмларын айтып, рекомендацияла бергендиле. 

Экинчи кюн форумну пленар сессиясы болгъанды, ол Шимал Кавказда медиа къоркъуусузлукъну жалчытыугъа жораланнганды. Анда федерал экспертле Россейни информация жаны бла жалынчакъсызлыгъын жалчытыргъа эм жалгъан билдириулеге къажау ишни къалай бардырыргъа кереклисин, жууаплы журналистиканы мурдорларын къураугъа, энчи аскер операция бардырылгъан кезиуде ётюрюк хапарланы жайылыуларына къажау къалай сюелирге керек болгъаныны эм жаш тёлюню медиа билимин ёсдюрюуде журналистле къаллай магъананы тутханларыны юсюнден сессияла бардырылгъандыла, форумгъа къатышханла экспертле бла тынгылы ушакъла этгендиле. 

РФ-ни МВД-сыны Шимал-Кавказ федерал округда Баш управлениясыны экстремизмге къажау арасыны келечиси Гаджи Абдулаев асламлы информация органлада басмаларгъа эм социал сетьледе жаяргъа жарамагъан «Экстремист ишге къажау ишни бардырыу» деген 114 федерал законнга тийишлиликде РФ-ни Юстиция министерствосуну сайтында басмаланнган экстремист материалланы тизмесини юсюнден айтханды. Абдулаев, бу магъаналы соруу бла байламлы асламлы информация органлада ишлегенлеге эм блогерлеге жаш тёлюню арасында ангылатыу ишни тохтаусуз бардырыргъа чакъыргъанды. Москваны О.Е. Кутафин атлы юридический университетни Информация жаны бла эм медиа къоркъуусузлукъну жалчытыу институтуну директору Владимир Никишин, бюгюнлюкде Россей Федерация информация урушлагъа къажау къаллай ишни бардыргъаныны юсюнден, экранда видео материалланы да кёргюзтюп, тынгылы билдириу этгенди, сора ол бардыргъан сессиягъа къатышханланы сорууларына жууапла бергенди.

Форумну ахырында анга къатышханлагъа солуу программа къуралгъанды эм   сертификатла бергендиле. 

Азретланы Хасан.