«Единая Россия» муниципал депутатланы битеуроссей форумун бардыргъанды. Анга битеу къыралдан да 200 аслам делегат жыйылгъанды. Сёз муниципал власть органланы ишлерин игилендириуню эмда келир жыл тамамланыллыкъ жумушланы юслеринден баргъанды.

Муниципал органлада келечилерини санына кёре «Единая Россиягъа» жетген бир партия да болмагъанын айтырчады. Ала 130 мингден асламды, ол а жер-жерли депутатланы 84 проценти тенглиди. Быллай тарихлени форумну пленар жыйылыуунда партияны башчысы Дмитрий Медведев белгили этгенди.

 - Муниципал депутатны иши энчи жууаплылыкъды, ол къыйын жумушду. Къыралны инсанлары жарсыуларын сизге билдиредиле. Айырыучула бла тюзюнлей байламлыкъ жюрютесиз, тамамланнган жумушланы контрольда тутасыз. Ол а ишигизни бютюнда уллу даражагъа чыгъарады, «Единая Россияны» керти да халкъ партия этеди, -дегенди Дмитрий Медведев эм жеринде тамамланнган жумушла ючюн ыразылыгъын айтханды.

Келир жылгъа борчла сала, партияны оноучусу бек алгъа энчи аскер операциягъа къатышханлагъа бла аланы юйюрлерине болушлукъну белгилегенди.

 - Бу соруу бла дайым да кюрешесиз, аны магъаналылыгъын иги билесиз. Жандауурлукъ жюкню жыйып, аны фронтха ашырасыз, СВО-гъа къатышханланы жууукъларына билеклик этесиз. Бу иш да бек къыйынды. Болсада къыралны Президенти салгъан битеу борчлагъа жетишгинчи аны тамамларгъа керекди,-деп къошханды Дмитрий Медведев.

 Сёз   Донецк эм Луганск халкъ республикаланы, Запорожье эм Херсон областьланы муниципал депутатларына себепликни, аланы политика жашаугъа сингдириуню юслеринден да баргъанды. Дмитрий Медведев   муниципал депутатла  партияны халкъ программасын къурагъанда эм жашауда бардыргъанда энчи жер алгъанларын да белгилегенди.

 - Биз айырыулагъа халкъ программа бла барабыз. Аны хазырлап башларгъа керекди. Аны бла бирге уа айырыучулагъа 2021 жылдан бери жашауда бардырылгъан программаны жумушлары къалай толтурулгъанларын билдирирге тийишлиди. Айтырча ишлерибиз а кёпдюле. Федерал, регион эм муниципал даражада белгиленнген ишле толтурулгъандыла. Ол себепден жангы объектлени юслеринден айтханда, жамауатха битеу бу жумушланы барыбыз да бирге толтургъаныбызны айтыргъа унутмагъыз –«Единая Россия», муниципал депутатла да. Ол а бизге хорларгъа болушурукъду,-деп къошханды ол.

 2026 жылда айырыу кампанияны аллында партияны битеу бёлюмлери ишлерин жангыртыргъа кереклисин чертгенди форумда сёлеше, партияны генсоветини башчысы   Владимир Якушев.

- Былтырны биз партияны биринчи бёлюмлерин тирилтиуге, ала тамамлагъан ишлени магъаналылыкъларын ачыкълаугъа жоралагъанбыз.   Энди уа муниципал депутатланы даражасын кётюрюрге керекди. Ала бирге байламлыкъда ишлейдиле. Жыл бошалгъаны бла муниципал депутатлагъа бурулгъан эс азайырыкъ тюйюлдю. Партияны иши ала бла байламлыкъда къуралады,-дегенди ол.

Форумну кезиуюнде башламчылыкъла да этилгендиле. Ол санда регионлада депутат къауумланы къураргъа, алай бла муниципал, регион эм федерал депутатланы ишлерин бирикдирирге кереклиси белгиленнгенди. Дагъыда «Халкъ депутат» конкурсну хар жыл сайын бардырыуну юсюнден да айтылгъанды.

Эсигизге салайыкъ, 2025 жылны «Единая Россия» Муниципал депутатны жылынча белгилегенди. Аны чеклеринде битеу субъектледе форумла бардырылгъандыла, алада айырыучула бла байламлыкъланы эм иги сынаулары сюзюлгендиле.

Форумгъа хазырланыуну чеклеринде битеу субъектледе муниципал депутатланы жыйылыулары бардырылгъандыла. Алада жамауат  бла байламлыкъланы, жандауурлукъ ишни, энчи аскер операциягъа къатышханлагъа бла аланы юйюрлерине болушлукъну, халкъ программаны толтурууну, жангы  регионланы къыралны жашаууна сингдириуню соруулары сюзюлгендиле. 

  Къабарты-Малкъардан форумгъа Залукокоажени бла Малканы жер-жерли самоуправления советлерини  депутатлары  Оксана Тхашокова, ол а «Халкъ депутат» конкурсда хорлагъанын айтырчады, эмда Мурад Тленкопачев къатышхандыла, деп билдиргендиле  KABARDIN-BALKAR.ER.RU сайтда.

- Форум бир бирибизни сынауубузгъа юйренирге, жангы башламчылыкъла этерге онг бергенди.  Биз депутатланы арасында бардырылгъан ачыкъ ушакъгъа къатышханбыз. Ол а ишибизни игилендирирге хазыр болгъаныбызгъа шагъатлыкъ этеди.  Биз айырыучула бла байламлыкъланы кючлерге хазырбыз, -дегенди форумдан сора  Оксана Тхашокова.

Тикаланы Фатима хазырлагъанды.