Къабарты-Малкъарда  сабийлени эмда жаш тёлюню   социал-маданият жаны бла айнытыуну «Культура.Ру» регион жамауат организациясы КъМР-ни Миллетлени ишлери эмда  жамауат проектле жаны бла министерствосуну  себеплиги бла кёп тюрлю ишле бардырады. Ол  санда ёсюп келген тёлюню орус  маданиятха сейирлерин къозгъар ючюн да къайгъырады. Алай бла бу кюнледе жамауат биригиуню келечилери Вольный Ауулда жашагъан сабийлеге деп, «Орус жомакъда къонакъда» деген ат бла сахна оюн кёргюзтгендиле. Анга жетиден оннга дери жыл санда болгъан къызчыкъла бла жашчыкъла  къарагъандыла, къууаннгандыла, кеслери да оюннга къатышхандыла.

 -Биз ёсюп келген тёлюню орус халкъ жомакъланы юлгюлеринде  ариулукъну кёре, ангылай билирге, аны бла бирге уа орус халкъ маданиятха, искусствогъа да жууукълашдырыргъа итинебиз, ол мурат бла ишлейбиз. Алай бла бу жолгъа дери да республиканы талай элини бла шахарыны окъуу юйлеринде болгъанбыз. Халкъ жомакъладан беш сахна оюн хазырлагъанбыз. Аланы кёргюзтгенде,  артистле залда олтургъан сабийлени  да  жомакъгъа къатышыргъа чакъырадыла,-дейди проектни башчысы  Зита Кабулова.

Андан сора да, ол айтханнга кёре, жомакъда Жаш къараучуну театрындан, Къулийланы Къайсын  атлы  Малкъар драма театрдан эмда Максим Горький атлы  орус драма театрдан артистле ойнайдыла. Аланы араларында Геляхланы Мурат, Алим Сибеков, Викитория Магомедова, дагъыда башхала бардыла. Вольный Ауулда жашагъан  сабийле оюнну, жомакъны да бек жаратханларын айтхандыла.

Сахна оюнну кезиуюнде орус халкъ тепсеулени, жырланы, макъамланы, костюмланы кёрюрге, эшитирге, викторинагъа къатышыргъа, артистле бла бирге ойнаргъа да  боллукъ эди. Ахырында  сабийле артистле бла бирге  ата журтларын сарыуекден къутхарадыла.

Холаланы Марзият.