Бу айны тёртюнчюсюнден башлап, жетисине дери Минги тауну этегинде тау лыжалада эмда сноубордда учаргъа сюйгенле жайыллыкъдыла. Ол кюнледе анда байрам, спорт, той-оюн жумушла бардырлыкъдыла,  деп билдиргендиле Кавказ.РФ айнытыу институтдан.

Ярмарка къуралгъан майданда аш-азыкъ этип турлукъдула, ары келгенле аланы татыуларын кёрюрге, мастер-класслагъа да къатышыргъа боллукъдула. Дагъыда алайда онметрлик гриль орнатып, эрттенден кечеге дери къой эмда гура этледен шишлик къуууруп турлукъдула, къонакъланы уа эрттенлерин жарауладан неда татыулу ашдан башларгъа онглары боллукъду.

Азау талада да ярмарка ачыллыкъды, таулагъа ёрлеучюлеге эмда лыжалада учуучулагъа тийишли кийимлени эмда аберилени алайда сынап да кёрлюкдюле.

Гитче сахнада уа музыка согъарыкъдыла, оюнла ётдюрлюкдюле, сабийлеге деп энчи программа да бардырлыкъдыла. Алтынчы декабрьде сахнагъа «Балкария» бла «Кабардинка» ансамбльле чыгъарыкъдыла, Терк къазакъланы той-оюн къаууму уа жырла эмда тепсеуле бла къараучуланы кёллерин кётюрлюкдюле.

«Кругозор» бла «Мир» станциялада ди-джейле ишлерикдиле, солуу тийреле да ачыллыкъдыла. «Къара-Башыдан» бийикде уа гольф ойнарча майданчыкъ жарашдырыллыкъды. Анда оюн 4100 метрден башланып, андан арлакъда – буз тюзде ётерикди.

Бу кюнледе «Терс-Къол тёппе» обсерваторияны къатларында, кюнчыгъыш жанында лыжалада учуу тийрени да ачаргъа дейдиле. Анда уа эки канат жол бла беш километрден артыкъ узунлугъу болгъан лыжа трасса бардыла.

Баш концерт сахна энди курортха жетгинчи орналгъан уллу парковканы тийресинде ачыллыкъды. Алайда жарыкъды, макъамла эшитилирча аламатды, тёпсеучюлеге да жер эркинди. Концертле 5 эм 6 декабрьде ингирде сагъат бешде башланырыкъдыла. Бешинчисинде анда Севиль (Artik&Asti) бла Фирайя (Firaya) жырларыкъдыла, алтысында уа   «Султан-Ураган» къауум эмда Санкт - Петербургдан келген рокерле  The Hatters чыгъарыкъдыла сахнагъа.

Байрам программада  дагъыда  аслам адам,  миллет кийимле кийип, лыжалада учарыкъдыла эмда «Архызны» къауумуна «Россейни эм аламат тау-лыжа курорту» сыйлы кубокну берликдиле.

Программаны кезиуюнде боллукъ жумушлагъа къатышыу хакъсызды, тауда ётерик затлагъа тюшерча уа аллындан окъуна сайтда эсепге турургъа эмда ски-пасс сатып алыргъа керек боллукъду. Спорт программагъа эмда парковкада ётерик концертге да билетле алыргъа тюшерикди.

Улбашланы Мурат хазырлагъанды.