Алгъаракълада «Хорламны ауазы» деген ат бла Нальчикде Маданият фондда VI республикалы жыр конкурс бардырылгъанды. Ол Уллу Хорламны 80-жыллыгъына жораланнганды. Анга къатышханланы жыл санлары жетиден башлап жыйырмагъа дери жете эдиле. Ала республикада болгъан тюрлю-тюрлю музыка школланы, жыр студияланы келечилери эдиле. Жаш жырчыла академиялы эмда эстрада жаны бла да усталыкъларын кёргюзтгендиле.
Быйыл конкурсха Искусстволаны Шимал-Кавказ къырал институтуну маданият эмда искусство колледжинден да эки студент къатышхандыла. Эришгенлени араларында бек гитчеге уа Нальчикден Отарланы Омар саналгъанды. Анга жаланда беш жыл болады.
Конкурсантла уруш жылланы, Ата журтха, юйюрге, фронтда хар кюнден тюбеген болумгъа эмда Уллу Ата журт урушну кезиуюнде болдурулгъан деменгили Хорламгъа жораланнган жырланы айтхандыла. Алагъа багъа бергенле уа профессионал жырчыла болгъандыла. Россейни халкъ артисти Наталья Гасташева, РФ-ни эмда КъМР-ни сыйлы артисткасы Таукенланы Галина, КъМР-ни Парламентини депутаты, Къабарты-Малкъар Республиканы сыйлы артисти Текуланы Амырбий эмда башхала.
Жюриге сайлау этерге тынч тюйюл эди, болсада ол жыл санларына кёре «Конкурсну биринчи даражалы лауреатлары» деген атха быланы тийишли кёргенди: Отарланы Омарны, Атабийланы Алибекни, Рамзан Султаевни, Аделина Цыпинованы, Игорь Метленкону, Камилла Сохрокованы, Адана Набитованы. Алагъа кубокла, дипломла эмда багъалы саугъала да берилгендиле. Гран-при а Даниил Дусенкогъа жетгенди. Дагъыда биринчи, экинчи, ючюнчю жерлеге чыкъгъанла да саугъасыз къалмагъандыла.
Бу жолгъу жыр эришиуню бардырыугъа «Единая Россия» политика партияны регион бёлюмю, КъМР-ни Маданият министерствосу эмда Россейни Халкъларыны ассамблеясы себеплик этгендиле.
Конкурсну мураты – ата журтлу жыр искусствону ахшы тёрелерин сакълау, ёсюп келген тёлюню патриот ниетде юйретиу, Россейни халкъларыны маданиятларыны даражаларын кётюрюу эмда жаш фахмулуланы ачыкълау болгъанды.
- Жаш жырчыланы араларында фахмулула кёп болгъанлары бизни къууандырады. Бу конкурсха къатышханлары уа аланы бютюн кёллендирлигине уа сёз жокъду. Эринмей, эрикмей, тутхан ишигизни андан ары таукел бардырыгъыз, жетишимле уа кеслери келирле! – дегенди профессор Наталья Гасташева.
Холаланы Марзият.
Суратла авторнудула.
