Юч кюнню ичинде Нальчикде «RT. Док: Жигитлерибизни заманы» деген халкъла аралы фестиваль бардырылгъанды. Аны къууанчлы жабылыуу ыйых кюн Жаш тёлюню юйюнде ётгенди. Мындан проект Мурманск шахаргъа тебирейди.
Аскер къазауатланы ветераны Кантемир Токмаков бла RT -телеканалны журналисти Ирина Галушко биринчи сёзню КъМР-ни жаш тёлюню ишлери жаны бла министри Азамат Люевге бергендиле. Ол быллай магъаналы, халкъны биригиулюгюне себеп болгъан фестивальны бардырылгъанын магъаналы ишге санагъанды.
- «Жигитлерибизни заманы» бери бизге да жетгени къууандыргъанды. Къыралны тюрлю-тюрлю регионларында бардырылгъан фестиваль бла бизни республиканы адамлары да шагъырей болур онг тапханлары игиди. Мен да бу ишни къурап, халкъгъа туура этгенледен бири продюсер Екатерина Яковлеваны КъМР-ни Жаш тёлюню ишлери жаны бла министерствосуну сыйлы грамотасы бла белгилерге сюеме, - дегенди ол.
Ызы бла уа фильмлери саугъала бла белгиленнгенлени сахнагъа чакъыргъандыла. Аланы араларында «Артха бир атлам да этмезге» деген волонтёр биригиуню таматасы Байсыланы Темиржан да болгъанды. Ол кесини къазауатда ёлген шуёху, «Известия» газетни корреспонденти Семён Ерёминнге атап алдыргъан «Война за соседним столиком» деген фильмге бийик багъа берилгенди. Байсы улу айтханнга кёре, фильмни жарашдырыргъа анга кёпле болушхандыла.
- Анга сабийле, абаданла да къарарча этгенбиз. Ата журту ючюн жанын берген жигитни сыфатлай, мен бюгюннгю энчи аскер операциягъа къатыша жан берген журналистлени барына да жоралагъанма, -дегенди Темиржан.
Ызы бла къонакъланы алларында «Терк къазакъла», «Зверобой» той-оюн къауум, жырчыла Азамат Цавкилов, Черим Нахушев эм дагъыда башхала фахмуларын кёргюзтгендиле.
Къасымланы Аминат.
Сурат авторнуду.
