РФ-ни Къырал Думасыны депутаты Виктория Родина, Бахсан районну билим бериу департаментини башчысы Марина Буранова эм ата-ана комитетни келечилери бла бирге Дыгулыбгей элде  90-чу номерли школну тынгылы жангыртыу жумушла къалай баргъанларын тинтгендиле. Анда  800 окъуучугъа жер барды.

Мекямгъа бек аздан  элли жыл болады. Аны жангыртыу «Жаш тёлю эм сабийле» миллет проектни чеклеринде бардырылады.

 Къурулуш ишле апрельде башланнгандыла. Бюгюннге мекямны тышы, башы жангыртылгъандыла, ичинде керекли ишле толтуруладыла. Школну башчысы   Марьяна Бербекова школну ичин сюртгенде бояуланы ата-анала сайлагъанларын, тышыны проектин а школну окъуучусу хазырлагъанын айтханды.

 Битеу ишле болжалла бузулмай толтуруладыла, тийишли келишимле этилгендиле, окъуу отоулагъа керекли оборудование сатып алыннганды. Жангы жылдан а Бахсан районну 650 окъуучусу жангыртылгъан школларына къайтып, шёндюгю излемлеге келишген болумлада билим аллыкъдыла.

Виктория Родина быйыл регионла  окъуучулагъа эшиклерин 9 жангы школ ачханларын, энтта 15-синде тынгылы жангыртыу жумушла бардырылгъанларын белгилегенди. Къурулуш ишле  жылны ахырына дери бошаллыкъдыла.

2028 жылгъа дери уа миллет проектлени эм тюрлю-тюрлю къырал программаланы чеклеринде республикада 72 школну, 17 сабий садны, орта профессионал билим берген 6 учрежденияны тынгылы жангыртыргъа, 8 сабий сад ишлетирге белгиленеди.

Тикаланы Фатима хазырлагъанды.