КъМР-ни Башчысы Казбек Коков Президентибиз Владимир Путин салгъан миллет борчланы толтуруу бла байламлы иш республикада тохтаусуз бардырылгъаныны юсюнден кесини телеграм-каналында билдириу этгенди.
Къырал Дума федерал бюджетни ахыр, ючюнчю окъулууунда 2026 жылгъа эм 2027 бла 2028 план жыллагъа къабыл этгенди. Бюджетни сюзгенде Къабарты-Малкъарны битеу асламлы башламчылыкълары болушлукъ тапхандыла. Ол республика властьны федерал органлары бла тохтаусуз эм биригип ишлегенини хайырындан болгъанды. Санкцияланы кийирилгенлерине да къарамай, къыралыбызны бюджети ёсе эм тутхучлу бола барады.
Миллет проектлени жашауда бардырыугъа бюджетге 21 триллион сом салыннганды, 2030 жылгъа дери уа 41 триллион къоратыллыкъды. Пенсияланы, пособияланы, ёлчемлерине къошулгъанлай барлыкъды, дагъыда кёп сабийли юйюрлеге, аскерчилеге эм аланы юйдегилерине болушлукъ этилгенлей турлукъду.
Андан сора да, медицина учрежденияланы инфраструктураларын жангыртыугъа, сабийликни эм аналыкъны къоруулаугъа, бийик эм орта билим берген юйлеге, мектеплеге бла сабий садланы ишлеуге эм жангыртыугъа, жоллада тынгылы ремонтну бардырыугъа, эллени хар не жаны бла да айнытыугъа, агропромышленный комплексге, туризмге, промышленностьха эм башха бёлюмлеге аслам эс буруллукъду.
Къабарты-Малкъаргъа федерал бюджетден финанс болушлукъну ёлчеми иги кесекге ёсгенди. 2026 жылгъа 47,3 миллиард сом белгиленнгенди, ол быйылгъы жылдан эсе 3,8 миллиард сомгъа кёпдю. Ол саннга миллет проетлени жашауда бардырыугъа бёлюннген 11,5 миллиард сом киреди, аны бла 2025 жылны бюджетинден эсе иги кесекге аслам болады.
Республиканы бюджетин толтуруугъа бла тутхучлу этиуге 24,6 миллиард сом бёлюнюрюкдю, ол кёрюмдю да быйылгъы жылдан эсе 2,2 миллиард сомгъа кёпдю.
Белгилерчады, жыл сайын кесибизде тюшген файдаладан республиканы бюджети ёсгенлей баргъанын, былтыр бла тенглешдиргенде, быйылгъы жылны он айына бюджет 16 процентге, неда башхача айтханда, 2,7 миллиард сомгъа кёп болгъанды. Къошакъ ырысхыла социал жумушланы тамамлаугъа, энчи алып айтханда, бюжет бёлюмде уруннганланы иш хакъларына къошаргъа онг береди. Битеу ол амалла республикада жашагъанланы жашауларын игилендирирге бурулупдула, деп айтылады билдириуде.