КъБР-м и Парламентым и Президиумым и зи чэзу зэIущIэм Iуэхугъуэ 20-м щIигъум щыхэплъащ. Ар иригъэкIуэ-кIащ хабзэубзыху IуэхущIапIэм и УнафэщIым и къуэдзэ Жанатаев Са- лим.
Зытепсэлъыхьахэм ящыщщ «Хэхыныгъэхэмрэ референдумхэмрэ ятеухуа республикэ законхэм зэхъуэкIыныгъэхэр хэлъхьэным и IуэхукIэ» КъБР-м и законым и проектыр. Законодательствэмрэ щIыпIэ унафэр зехьэнымкIэ комитетым и унафэщI Мэлбахъуэ Борис жиIащ законопроектымкIэ республикэм и хабзэ актитхум зэхъуэкIыныгъэхэр зэрыхалъхьэр.
Депутатхэр тепсэлъыхьащ «Автомобиль гъуэгухэм зэрелэжьым теухуауэ» щIыналъэ законым и проектым. ПромышленностымкIэ, транспортымкIэ, связымрэ гъуэгу IэнатIэмкIэ комитетым и унафэщI Къалмыкъ Марат жиIащ Къэбэрдей-Балъкъэрым и гъуэгухэм зэрелэжьым ехьэлIа хабзэхэр зэрырагъэфIэкIуэнур къызэрыхалъхьэр.
ЗэIущIэм щыхэплъащ «Егъэджэныгъэм теухуауэ» КъБР-м и Законым и 6-нэ Iыхьэм зэхъуэкIыныгъэ хэлъхьэным теухуауэ» КъБР-м и законым и проектым. ЕгъэджэныгъэмкIэ, щIэныгъэмкIэ, физическэ щэнхабзэмкIэ, спортымрэ щIалэгъуалэм я IуэхухэмкIэ комитетым и унафэщI Емуз Нинэ жиIащ «УФ-м и законодательнэ акт щхьэхуэхэм зэхъуэкIыныгъэхэр хэлъхьэным и IуэхукIэ» Федеральнэ закон №314-р къызэращтам къыхэкIыу дэфтэрыр зэрагъэхьэзырар. «УФ-м и Егъэджэныгъэм теухуауэ» Федеральнэ законым къыщыгъэлъэгъуащ егъэджэныгъэм ехьэлIа унафэхэр зыгъэзащIэ IуэхущIапIэхэм я къалэным зэрыдыщIагъур. Ар теухуащ «Зэреджам теухуа дэфтэрхэм я федеральнэ реестр» хъыбарегъащIэ системэм хамэ къэрал къикIахэр къэпщытэныгъэм зэрыпхыкIар къызэрыщагъэлъэгъуэжынум. Урысыбзэ зэрызрагъэщIар къызэрапщытэ тестыр ехъулIэныгъэкIэ яхуэтмэ, щIэныгъэ иратын мурадкIэ еджапIэхэм къащтэну я пщэрылъщ. Абы теухуа унафэр къыщагъэлъэгъуэнущ «Егъэджэныгъэм теухуауэ» КъБР-м и Законым и 6-нэ Iыхьэм и пункт 18-м.
КъБР-м и Парламентым БюджетымкIэ, налогхэмрэ финанс IуэхухэмкIэ и комитетым и унафэщI АфэщIагъуэ Михаил утыку кърихьащ «Патент IэмалкIэ налогыр Къэбэрдей-Балъкъэрым зэрыщытрагуашэм ехьэлIауэ» КъБР-м и Законым 2-нэ Iыхьэмрэ гуэдзэнымрэ зэхъуэкIыныгъэхэр хэлъхьэным и IуэхукIэ, «КъБР-м ФIэкIыпIэ зимыIэ медицинэ страхованэмкIэ и щIыналъэ фондым и и бюджетыр 2025, 2026 - 2027 гъэхэм ятещIыхьауэ» щIыналъэ законхэм я проектхэр.
Законопроектхэм зыщагъэгъуэзэну хуагъэхьащ ахэр зи пщэрылъ IуэхущIапIэхэм. Абыхэм елэжьа нэужь, КъБР-м и Парламентым и зэIущIэм щыхэплъэнущ.
КъищынэмыщIауэ, зэIущIэм щытепсэлъыхьащ Iуэхугъуэ зэмылIэужьыгъуэхэм ятеухуауэ нэгъуэщI щIыналъэхэм я жэрдэмхэмрэ федеральнэ законхэм я проектхэмрэ.
Юристым и махуэм ирихьэлIэу, унафэ ящIащ КъБР-м и Парламентым и ЩIыхь тхылъ иратыну а IэнатIэм хэлъхьэныгъэфI хуэзыщIхэм ящыщ зыбжанэм.
КъБР-м и Парламентым и
пресс-IуэхущIапIэ.