Къабарты-Малкъарны Правительствосуну Председатели Мусукланы Алийни башчылыгъы бла кезиулю кенгеш ётгенди. Анда транспорт, жамауатны социал къоруулау, эл мюлк, маданият эмда талай башха бёлюмлени ишлери бла байламлы бир ненча оноу этилгенди.
Адамланы транспорт жаны бла жумушларын жалчытыуда регионда комплекс планны жарашдырыуну дурус кёргендиле жыйылыуда. Бу документ къырал законлада болгъан тюрлениулени жалчытыуда изленеди, кеси да жамауат транспорт бла ташыу ишни тийишдирликди. Аны юсюнден транспорт эмда жол мюлк министр Аслан Дышеков хапарлагъанды.
Кенгешде бюджетни юсюнден да сагъыннган эдиле. Авиарейслени эмда шахарланы арасында жюрюген пассажирлени саны азайгъаны себепли, къоратылмай къалгъан ахча къырал программаланы тамамлаугъа жиберилликди. Келир жылда ол 41,4 миллион сом боллукъду.
Элледе жашау журт къурулушну айнытыу хыйсап бла субсидияла бериу жорукъла да тюрлендирилгендиле. Анга кёре аллай тёлеуню алыргъа эркинликлери болгъанланы тизмеси кенгертилгенди. Ары уа элледе агъач мюлк организациялада уруннганланы къошхандыла. Мобилизация бла чакъырылгъан эмда энчи аскер операциягъа къатышхан аскерчиле, сора миллет гвардияда къуллукъ этгенле жашау журтну очередьге турмай алыргъа боллукъдула. Аны бла жыйылгъанланы КъМР-ни эл мюлк министри Хасан Сижажев шагъырейлендиргенди.
Келир Жангы жыл байрамны сабийлеге кенг эмда къууанч халда белгилерге оноу этилгенди: 25 декабрьден башлап, 30 декабрьге дери, сора 2 январьдан 5 дери Нальчикде Музыка театрда конкурслары эмда викториналары бла той-оюн жумушла къураллыкъдыла. Бу ишни тамамлаугъа республиканы бюджетинден - 5, профсоюзланы атындан а 4 миллион сом бёлюрге келишгендиле. Жер-жерли администрациялагъа ары эм биринчиден кёп сабийли эмда къолайсыз юйюрледен, ёксюз къалгъан эмда сакъат сабийлени чакъырыргъа буйрукъ берилгенди. Урунуу эмда социал къоруулау министр Тогъузаланы Тахир билдиргеннге кёре, алагъа 19 минг саугъа сатып алынырыкъды.
Саулукъ сакълау министр Рустам Калибатов былтыр берилген медицина болушлукъну багъасын, сора республикада жашагъанла тыш регионлада медицина учреждениялада эмда аладан келген инсанла мында багъылгъанлары ючюн тёлерча 397 миллион къоратыллыгъын билдиргенди. Тюрлю-тюрлю жумушладан а республиканы бюджетине 102 миллион сом тюшеригин да туура этгенди.
Кенгешде дагъыда жаш художниклени «Кавказ. Притяжение будущего» чыгъармачылыкъ конкурсунда хорларыкъланы онгдурургъа ахча бёлюрге келишедиле. Андан сора уа Уллу Ата журт урушда ауушханланы ёлюклерин асырау жумушлагъа хазырланыу эмда аланы тамамлау комитетни къауумуна тюрлениуле кийирилгендиле.
Улбашланы Мурат
