Кёп болмай Къабарты-Малкъар къырал университетни медицина академиясында 55-чи халкъла аралы илму-практика конференция ётгенди. Анга Россейден, Сауд Аравиядан, Индиядан, Бурундиядан, Эфиопиядан, Иорданиядан, Сириядан, Египетден, Палестинадан, Бирикген Араб Эмиратладан, Абхазиядан, Узбекистандан, Таджикистандан бла Беларуссиядан студентле, аспирантла эм жаш алимле къатышхандыла. Ала микробиология, хирургия, ич, сабий ауруула, неврология, акушерство, гинекология эм башха жаны бла докладла этгендиле.
Программагъа кёре, конференциягъа Нальчикни 2-чи номерли лецейини "Жаш медик" бёлюмюнде окъугъан школчула да къатышхандыла. Ала медицина илмугъа сейирлеринден тышында, кеслерини кёз къарамларын да ачыкълагъандыла.
Жыйылыуда аурууну тохташдырыуда, багъыуда да жангы технологияланы хайырланыугъа, жамауатны саулукълу жашау бардырыргъа кереклисине тютюшндюрюуге, аурууладан алгъадан сакъланыугъа да аслам эс бурулгъанды.
Медицина колледжде окъугъанла багъыу ишде медсестраланы магъаналылыкъларын кёргюзтгендиле, КъМКъУ-ну менеджмент, туризм эм къонакъбайлыкъны къурау институтуну студентлери да «Тау медицина» секцияны кезиуюнде тау бийикликледе къозгъалгъан аурууну, андан сакъланыуну бла багъыуну аммаларын сюзгендиле.
Электроника, робототехника эм жалгъан интеллект жаны бла институтну студентлери да медицинада цифралы амалланы хайырланыуну юсюнден проектлери бла шагъырейлендиргендиле.
Жюрини келечилери жаш алимлени къыйматлы проектлерине бла докладларына бюсюрегенлерин айтхандыла.
Ахырында медицина академияны таматасы Мызыланы Исмайыл конференцияда кёргюзтюлген проектлени асламысы жашауда бардырылыргъа тийишли болгъанларын белгилегенди.
– КъМКъУ-да къыралны регонларындан, тыш къаралладан да жаш алимлени, специалистлени бирикдирген майдан болгъанына ёхтемленирчады. Конференциягъа школчула эм медицина жаны бла окъумагъан студентле да эс бургъанларын энчи белгилерге сюеме. Ол медицинаны бирси бёлюмле бла байламлы болгъанын ачыкълайды. Аны бла бирге медицина туризмни, цифровизацияны, инновацияланы къыйматлыкъларына да тюшюннгенбиз, ол себепден аланы жашауда бардырырча мадар этерге керекбиз, - дегенди Мызы улу.
Эсге сала айтсакъ, конференцияны юбилейи Къабарты-Малкъарда ётгени, республикада медицина бёлюм тири эмда жетишимли айный баргъанын ачыкълайды.
