КъМР-ни Парламентини профильли комитетлерини жыйылыуларында депутатла министерстволаны бла ведомстволаны келечилери бла бирге «КъМР-ни 2026 жылда эм 2027-2028 план кезиуде республикалы бюджетини юсюнден» законну проектин тинтедиле.
Финансла министр Елена Лисун келир юч жылны бюджетини проекти эм налог-бюджет политика бла шагъырей этгенди. Документ хазырланнганда, регионну налог эм бюджет политикасыны энчиликлери эсге алыннганларын чертгенди. Файдала КъМР-ни 2026 жылда эм 2027-2028 план кезиуде социал-экономикасын айнытыуну прогноз планыны мурдорунда тергелгендиле.
Федерал бюджетни проектинде бюджетле аралы трансфертле къабыл кёрюлгенден сора республикалы законнга тийишли тюзетиуле кийирилликлерин белгилегенди министр. Ол санда проектлени тамамлаугъа республика къошарыкъ ахчаны ёлчеми да саналлыкъды.
Законла жарашдырыу эм жер-жерли самоуправление, Жамауат къоркъуусузлукъ эм коррупциягъа къажау, Контроль эм регламент жаны бла комитетле бирге бардыргъан жыйылыуда бюджетни сюзе, жарашдырыучу судьяланы ишлерин жалчытыу, инсанлагъа социал тёлеуле, ёксюз эм къарар адамлары болмагъан сабийлеге жашау журтла бериу эм башха магъаналы соруула кётюрюлгендиле.
Урунуу, социал политика, саулукъ сакълау, ветеранланы ишлери, Билим бериу, илму, физический культура, спорт эм жаш тёлюню ишлери, маданият, граждан обществону айнытыу эм информация политика жаны бла комитетле бирге бардыргъан кенгешде уа социал магъаналы жумушла сюзюлгендиле. Ол санда льготалары болгъанланы дарманла бла жалчытыуну, паллиатив болушлукъну айнытыуну, школлада окъуу китапланы сатып алыугъа ахчаны кёбейтиуню эм башхала. Культура хазнаны эсгертмелерин къырал сакълауну, «Эльбрус» жаш тёлю лагерьни ишлетиуню, спорт майданланы тапландырыуну юслеринден да айтылгъанды.
Экономика политика, инновация айнытыу, туризм эм предпринимательство, Аграр соруула, табийгъатны хайырланыу, экология эм тёгерекдеги къудуретни сакълау комитетлени жыйылыуларында уа энчи аскер операциягъа къатышханлагъа болушлукъну, жаш тёлю предпринимательствону, гитче эм орталыкъ бизнесни, череклени жагъаларын кючлеуню, малчылыкъгъа бла жюзюмчюлюкге субсидияла бериуню сорууларына къаралгъанды.
Къурулуш, жашау журт-коммунал мюлк эм отлукъ-энергетика, Промышленность, транспорт, связь эм жол мюлк жаны бла комитетлени депутатлары уа шахарлада ырахматлы болумла къурауну, адамланы оюла тургъан юйледен кёчюрюуню, «Къоркъуусуз республика» комплексни ырысхы-техника базасын игилендириуню юслеринден айтхандыла. Дагъыда Кёп функциялы араланы ишлерин жалчытыугъа къошакъ ахча бёлюуге эс бурургъа да чакъыргъандыла. Сабийлени эм жаш тёлюню жолда аварияланы профилактикасына бурулгъан жумушлагъа къошуугъа, сабий автошколланы айнытыугъа ахча бёлюуню юсюнден да айтылгъанды.
Кенгешледе этилген башламчылыкъла бюджетни проекти андан ары сюзюлген кезиуде эсге алынырыкъдыла. Тюзетиуле Бюджет, налогла эм финанс рынокла жаны бла комитетни къараууна берилликдиле.
Быйыл 18 ноябрьде уа КъМР-ни Парламентинде бюджетни проекти жамауат тынгылаулада сюзюллюкдю.
Документ Парламентни сайтында «Законланы проектлери» бёлюмде басмаланыпды, аны бла тыйгъычсыз шагъырейленирге онг барды: parlament.kbr.ru.
КъМР-ни Парламентини пресс-службасы.
