Бу кюнледе Россейде белгили драматург, киносценарист эм поэт Ольга Михайлова бизни республикада миллет маданиятла бла шагъырей болады. Ол Малкъар къырал драма театрны труппасы бла тюбешгенди эмда «Къайсыннга жюз атлам» деген таш хунагъа барып,  дуниягъа аты айтылгъан поэтибизге къуралгъан эсгертмени да кёргенди.

Тюбешиуню кезиуюнде сёлеше, малкъар театрны директору Жангоразланы Мажит  миллет драматургияны болмагъаны  бусагъатда  къыйын проблемаладан бири болгъанын эсгертгенди. «Таулуланы тарыхлары сахнабызда болургъа кереклисин ким да ангылайды, алай драматургла театрны ичинде «бишедиле», ёседиле, бизге аллай адамла керекдиле», - дегенди. Анга тынгылагъандан сора, Ольга Михайлова  бу ишге къолундан келгенни этерге айтханды.

Театрны артистлери Байсыланы Марзиятны «Тихон» деген пьесасын да сюзгендиле, авторгъа соруула да бергендиле. Бу пьеса Ольга Михайлова бардыргъан курслада жазылгъанды. Ольга Игоревна Малкъар театр бла байламлыкъ жюрютюрге хазыр болгъанын айтханды.

Дагъыда бу тюбешиуде «Саудюгерчиле» деген спектакльни юсюнден да сёз баргъанды. «Мен бусагъатда «Алтын къап» («Золотая маска») фестивальда экспертлик этеме да, эки жюзден артыкъ спектакльге къарагъанма, аладан  онусу айырырчадыла. «Саудюгерчиле» бийик профессионал даражада салыннганды. 

Бу пьесаны бир сёзю да эски болмагъанды. Ата-аналаны бла сабийлени араларында кёп жууапсыз соруула, жарсыула бусагъатдача кёп бир заманда да чыкъгъан болмазла. Атаны балаларына сюймеклигин, алай алагъа насып саугъалаялмагъанын  Жангоразланы Мажит бек уста кёргюзтгенди. «Бу спектакльде ата чынтты атады. Жюрегиме жетгенди  спектакль», - дегенди драматург.

Спектакльни кючю недеди? Революция жете тургъанын сезиу, къара-къатышлыкъ, бир бирни ангыламаулукъ, насыпны, тынчлыкъны жокъ болгъанлары  бир юйюрню юлгюсюнде кёргюзтюледиле. Хау, атаны бла ананы сабийлерин ангыламагъанлары жангылыкъ тюйюлдю, алай дунияда болгъан келишмеулюк, къаугъалыкъ, къатышлыкъ юйге да кирсе, хар инсанны керти бети ачылады.  «Бессемёнов юйюрюн тутады, юйюню эшиклери адамлагъа ачыкъды. Ол аман адам тюйюлдю. Аны жыйгъан байлыгъын  кеси ёсдюрген революционер Нил сыйырлыкъды келлик заманлада, жашы  Пётр да бек жарлыланы санына къошуллукъду. Бессемёнов  келе тургъан къыйынлыкъланы сезеди», - дегенди Ольга Игоревна «Заман» газетге берген интервьюсунда.

Дагъыда ол малкъарлы артистле «Саудюгерчиледе» бир ниетли болуп, ойнагъанларын чертгенди. «Хар биригиз кеси жеригизде бек аламат  ишлегенсиз, кесигизни къой, ойнагъан жигитигизни толусунлай кёргюзталгъансыз. Сау болугъуз!», - дегенди.

«Заман» газетге интервьюсунда Ольга Михайлова малкъар театр Къулийланы Къайсынны атын жюрютгенине  къууаннганын билдиргенди. «Мен аны поэзиясы бла шагъырейме. Аны жаланда назмулары угъай, битеу жашауу, ниетини тазалыгъы, кишилиги барыбызгъа да юлгюдюле. Мен акъыл этгенден, маданият хар адамны жюрегин ачыкъ этип къояды, аны ючюн жазгъанла, сахнагъа чыкъгъанла да жанларын аман затладан сакъларгъа керекдиле. Малкъар халкъ, закийине сый берип, ёмюрлюк хуна ишлегени  бек кёллендиреди. Поэт назмуларын халкъгъа деп жазады», - дегенди. 

Ольга Михайлова онжети фильмге бла сериалгъа киносценарийле жазгъанды, ала кёп даражалы фестивальлада сыйлы саугъалагъа тийишли болгъандыла. Аны пьесаларына кёре салыннган  спектакльле Россейде эм тыш къыраллада кёргюзтюледиле. Быллай фахмулу адамны бизни миллет театрыбызгъа бийик багъа бергени чексиз багъалыды. 

Байсыланы Марзият.